Հայաստանի Հանրապետության Կառավարություն

ՀՀ ազգային ժողովի խոսնակ Հովիկ Աբրահամյանի հրաժարականի լուրը «գրավել է» գրեթե բոլոր լրատվամիջոցների «գլխավոր էջերը» և բազմանշանակ մեկնաբանությունների առիթ տվել։ «Երկիրը» մասնավորապես գրել է. «Հրաժարականների շքերթը շարունակվում է», «Հայկական ժամանակը»՝ հավելել, թե իբր «բոլոր այս պրոցեսները», որոնց ընթացքում «լիկվիդացվել» են բոլոր նրանք, ովքեր «համարվել են ՀՀ վարչապետի թեկնածու», տեղի են ունենում «իշխանական խոհանոցում», և փորձել իր հանգույն պարզել այդ ամենի նպատակը։ «Հրապարակը» դիմել է բազմաճարտար արևմտահայերենի օգնությանը՝ «Դեռ ինչե՜ր պիտի ըլլան...»։
«Ժամանակի» մի տեղեկացմամբ ԱԺ նախագահի թեկնածու է համարվում ԱԺ պետաիրավական հանձնաժողովի նախագահ Դավիթ Հարությունյանը, իսկ մի այլ հրապարակման մեջ թերթը նշել է, թե իբր ԼՂՀ անկախության տարեդարձից օրեր անց ՀՀ նախագահին «հայտնի է դարձել», թե «իշխանական դավադրություն» է պատրաստվում իր դեմ։
Չարաբաստիկ «դավադրության թեմային» անդրադարձել է նաև «Ժողովուրդը» գրելով, թե իբր «պաշտոնանկությունների շքերթի պատճառը... ծրագրված դավադրության բացահայտումն է»։ «Հայացքը» և «Երկիրը» արձագանքել են ԱԺ պատգամավոր Համլետ Հարությունյանի և «Ժառանգություն» կուսակցության քարտուղար Կարինե Հակոբյանի՝ երեկ լրագրողների հետ հանդիպման մանրամասներին, որի ընթացքում վերջինս ՀՀ վարչապետ Տիգրան Սարգսյանի հայտարարությունը («Ովքեր չեն համագործակցի մեզ հետ, կհայտնվեն կոտրած տաշտակի առաջ») որակել է «հակասահմանադրական»։
Երեկ ԱԺ-ում մեկնարկած 2012թ. պետբյուջեի նախագծի քննարկմանն իր անդրադարձը «Օրակարգը» վերնագրել է «Ինդեքսավորել բյուջեն. ծախսերը կաճեն գնաճի չափով»։ «Ազգը» և «Հրապարակը» կարևոր են համարել, որ «100 միլիարդով ավելի եկամուտների համար» նախատեսվում են նոր մեխանիզմներ, և «կառավարությունը նախատեսում է «պրոգրեսիվ և շքեղության հարկ մտցնել»։ «Հայկական ժամանակը» ԱԺ-ում վարչապետ Տիգրան Սարգսյանի ելույթին արձագանքել է սեփական դիտակետից և դարձյալ հանգել հոռետեսական եզրակացության. իբր «ելույթն իսպառ ջախջախեց այն հույսը, թե գործող կառավարությունը առաջնորդվում է ինչ-որ տրամաբանությամբ և ծրագրով»։ «Բյուջեի թեմայի» առիթով «Օրակարգը» կարծիք է հայտնել, որ «100 մլրդ դրամի ճակատագիրն այսօր շատերին է հուզում»։
«Ժողովուրդի» հետ զրույցում ՊԵԿ-ի նախագահ Գագիկ Խաչատրյանը նշել է. «Ստվեր կա, աշխատում ենք»։ «Երկիրը» անդրադարձել է 2012թ. պետական բյուջեում «սոցիալական փաթեթի» մանրամասներին և զարմանալի համարել, որ կառավարությունը կարծես չի նախատեսում «քաղծառայողների աշխատավարձի ուղղակի բարձրացում»։ «Հայոց աշխարհը» գրել է, որ կառավարությունը կարծես չի շտապում հրապարակայնացնել բյուջեի կատարողականն ապահովող հարկային փոփոխությունների փաթեթը, սակայն միաժամանակ ներկայացրել է նույն փաթեթի «դրական և բացասական կողմերը»։