ուրբաթ, 11 նոյեմբերի 2011
Հարկային փաթեթի լաբիրինթոսում
«Օրակարգը» անդրադարձել է կառավարության երեկվա նիստին ու մասնավորապես նշել, որ ընդլայնվել են ՏՄՊՊ հանձնաժողովի իրավասությունները համապատասխան որոշմամբ. այսուհետև հանձնաժողովը կարող է իրեն վերապահված գործառույթների շրջանակում հարկային մամնից պահանջել «գաղտնի համարվող տեղեկություններ` առանց իրավաբանական և ֆիզիկական անձանց մասին կոնկրետ տվյալներ նշելու»: «Առավոտի» հրապարակումը հնարավորինս ամփոփ և ամբողջական կերպով ներկայացրել է, թե «Հայաստանյան տնտեսության հեռանկարը» ինչպես է «պատկերացնում կառավարությունը», որ «նորանկախ հանրապետության պատմության մեջ առաջին անգամ հաստատել է արդյունաբերության քաղաքականության հայեցակարգը», որպես երկրի տնտեսության զարգացման «առաջիկա տարիների գլխավոր հրամայական»: «Հայաստանի զրուցակիցը» արձագանքել է առաջարկված հարկային բարեփոխումների նոր փաթեթի քննարկումներին և ներկայացրել այդ առիթով ԱԺ պատգամավոր Վարդան Այվազյանի ու ԿԲ նախկին նախագահ Բագրատ Ասատրյանի երեկվա «թեժ» բանավեճը, որին, ի դեպ, իր անդրադարձը «Ազգը» խորագրել է «Հարկային փոփոխությունների փաթեթ` համեմված հրաժարականի փոխադարձ պահանջներով»:
«Օրակարգը» հայտարարել է, որ «Բանկերը 70%-ով շատ հարկ են վճարել», ասել է թե` «վատ չեն ապրում»: Ըստ «Հրապարակի» տեղեկությունների քաղծառայողների սոցիալական ապահովության փաթեթի ներդրման նպատակով կառավարության նախաձեռնությունը «քաղծառայողների սրտով չէ», և նրանք առաջարկում են «այդ 1,8 միլիոն դրամը... ուղղակի ավելացվի քաղծառայողի համեստ աշխատավարձին»: «Իրատես դե ֆակտոյի» հետ զրույցում ՀՅԴ-ական խորհրդարանական Արա Նռանյանը նախ վերահաստատել է, որ «սոցիալական քաղաքականությունը քաղաքացիների համար աշխատատեղեր ստեղծելն է ու եկամուտի աղբյուրներ ձևավորելը», հետո հայտնել իր մտահոգությունը, թե «այն մոդելը, որ կառուցում ենք Հայաստանում, հետամնաց երկրի մոդել է», ապա... դժվար հասկանալի համարել, թե «կառավարությունն ինչ է հասկանում «սոցիալական» բառն օգտագործելով: «Հայկական ժամանակը», տնտեսությունը բնութագրող իրական ցուցանիշները ուսումնասիրելով, դարձյալ ընկել է հոռետեսության գիրկը և ահազանգել, թե իբր` «երկրիս վիճակը լավ չէ, հեչ լավ չէ»: Տնտեսագետ Թաթուլ Մանասերյանի հետ զրույցը «Հայացքը» ոչ պատահաբար խորագրել է «Երկրի պետբյուջեն ավելի ծրագրային է դառնում». «Երկիրը», օրեր առաջ «պետական համակարգից և իշխանությունից գործարարության տարանջատման» անհրաժեշտության մասին ՀՀ նախագահ Սերժ Սարգսյանի առաջարկությունը դրական գնահատելով, այդուհանդերձ հարցրել է. «Օլիգարխիայի մայրամո՞ւտ, թե՞ նախընտրական բլեֆ»:
