ուրբաթ, 18 նոյեմբերի 2011
Լրատվամիջոցների ամլությունը
«Իրատես դե ֆակտոն» կարծիք է հայտնում, որ մեր մամուլի ազատությունն ընկալվում է «լրատվամիջոցների ամլության» որակով. «Առանց պարզելու՝ պարզաբանում են, առանց հասկանալու՝ հասկացնում են, առանց տեղեկանալու՝ տեղեկացնում են։ Ո՞վ է նրանց իրավունք տվել շարունակաբար բռնաբարելու ընթերցողի ու ունկնդրի միտքը, ժամանակը, նյարդերը։ Ո՞վ է հնարել, թե դա է ամենապահանջված ապրանքը, որ ամենամեծ սպառողն ունի»։ Ըստ երևույթին ծանոթ չլինելով թերթի այս հռետորական հարցերին, ԶԼՄ-ները շարունակում են արծարծել անհեթեթ թեմաներ՝ «Խմել և շարիկ գլորել սիրո՞ւմ եք» («Հայացք»), «Լիսկայի մուշտիի քաղաքական աստառը» («Իրավունք»), «Համալսարանները դարձրել են «դուքան» («Հրապարակ») և այլն։ Այս թերթը և «Ժողովուրդը» «լավատեղյակ են» նաև ՀՀԿ գործադիր մարմնի երեկվա նիստի մանրամասներին և նկարագրում են կադրային հնարավոր ու անհնար փոխատեղումները։
«Հայացքը», օգտագործելով ՀՀ վերահսկիչ պալատի ուսումնասիրության արդյունքները, քննադատում է ՀՀ բնապահպանության նախարարության աշխատանքը՝ «Բնությունը պահպանելու փոխարեն շենք են վերանորոգել, ուղեգորգեր գնել», «Օրակարգը» դժգոհ է, որ «Հայաստանի արտահանումը շարունակում է միագույն մնալ. դիվերսիֆիկացում ոչխարներով», իսկ Առևտրի և զարգացման սևծովյան բանկի նախագահը, «Դելովոյ էքսպրեսի» փոխանցմամբ, հավաստում է, որ իրենք կարողանում են աշխատել Հայաստանի հետ։
«Երկիրը» «ազդարարելով» ԱԺ-ում 2012թ. բյուջեի նախագծի քննարկման ավարտը, տեսակետ է հայտնել, որ «ընդդիմությունը դեմ կքվեարկի, իշխող կոալիցիան՝ բնականաբար կողմ»։ «Հրապարակը» քննարկումը որակել է որպես ապացույց այն բանի, որ «ԲՀԿ-ն հնազանդվել է Սերժ Սարգյսանի ու կառավարության ներկայացրած բյուջեին», «Ժողովուրդը» հավելել իր ուրույն կարծիքը, թե իբր «Կոալիցիոն ուժերը վախենում են յուրովի»։
Ըստ «Հայոց աշխարհի»՝ բյուջեի «նախագիծը զգալի փոփոխությունների չի ենթակվի», քանի որ այն դիտարկվում է իբրև «ճեղքումային բյուջե՝ իրատեսական «շեշտադրումներով», ինչպես հայտնել է ԲՀԿ-ական պատգամավոր Վարդան Բոստանջյանը։
«Հայացքը», «Հայկական ժամանակը», «Ժամանակը» և «Հրապարակը» ներկայացրել են ՀՀ նախկին վարչապետ Հրանտ Բագրատյանի երեկվա ասուլիսի մանրամասները. ըստ նախկին պաշտոնյայի հոռետեսական կանխատեսման մենք «2012-ին ավելի վատ կապրենք», քանի որ «հոգուտ ժողովրդի ոչ մի վերաբաշխում չի լինելու». գալիք տարվա ֆինանսական գլխավոր փաստաթուղթը «կլինի արտագաղթի բյուջե» և այլն։
«Երկիրը» անդրադարձել է լրագրողների հետ ԱԺ պատգամավորներ Լարիսա Ալավերդյանի և Ռաֆիկ Պետրոսյանի հանդիպմանը և եզրակացրել. «իշխանությունը նոր մարդկանց կարիք ունի»։ «Իրավունքը» ոչ պատահաբար հարցրել է, թե «Օլիգարխիան լա՞վ բան է, թե՞ վատ», «Օրակարգը»՝ փորձել պատասխանել, թե ինչու է կառավարությունը առաջարկել տեղական գարեջրի ակցիզային հարկը բարձրացնել ու ... հընթացս եկել եզրակացության, թե իբր «կառավարությանը նույնիսկ ձեռնտու է ներքին շուկայում ներկրվող գարեջրի սպառման ավելացումը», քանի որ «վճարվում է... մաքսատուրք»։
