Հայաստանի Հանրապետության Կառավարություն

«Երկիրը» վերստին անդրադարձել է Հայաստանի տնտեսության և արտաքին պարտքի սպասարկման հեռանկարների վերաբերյալ «Moody’s» վարկանիշային գործակալության բացասական գնահատականներին և հավելել, թե իբր «միջազգային հեղինակավոր... կազմակերպությունը կրկնում է գրեթե նույն մտահոգությունները, որոնք հնչեցնում են մեր բազմաթիվ տնտեսագետները»։ «168 ժամը» կարծիք է հայտնել, թե այդ գնահատականները նվազեցնում են Հայաստանի վարկանիշը «դրանից հետո բոլոր տխուր եզրակացություններով», նաև փոխանցել ՀԱԿ ներկայացուցիչ Վահագն Խաչատրյանի «հորդոր-առաջարկը», թե «իշխանությունն արդեն այսօրվանից պետք է կամ փոխի բյուջեն, կամ բյուջեի այլ սցենար ներկայացնի»։ Մի այլ հրապարակման մեջ թերթը փորձել է պարզաբանել իր իսկ բնութագրմամբ՝ «Բյուջեի թաքուն հույսերը», նշել, թե իբր «քնքշության աստիճանի դանդաղ է բացահայտվում» 2012թ. բյուջեի նախագծի հետ ներկայացված հարկային փաթեթը, որի պատճառով այն՝ «լայն հասարակությանն անհայտ մնաց»։
«Օրակարգը» ներկայացրել է ռուսաստանաբնակ գործարար Լևոն Հայրապետյանի տեսակետը, որ «կոռուպցիան Հայաստանի համար ամենագտանգավոր բանն է», որի հիմքերը «դրել է Լևոն Տեր-Պետրոսյանը Հայաստանի համար ամենապատասխանատու ժամանակահատվածում», և որ «Հայաստանում պետք է իրականացնել «ցուցակ» օպերացիա, կազմել որոշակի մարդկանց ցուցակ և «լուծել հարցերը»։ Իսկ ահա նախկին վարչապետ Հրանտ Բագրատյանի ժամանակ առ ժամանակ ակտիվացմանը յուրովի է արձագանքել «Գոլոս Արմենիի» թերթը. «Երբ Բագրատյանը քննադատում է գործող կառավարությանը, որ նրա ղեկավարը հասարակությանը հստակորեն չասաց, թե 2012-ին լավ է ապրելու, թե վատ, մնում է միայն կարեկցել հասունացած, բայց այդպես էլ ոչինչ չհասկացած «գանգրահեր տղային» տնտեսագիտական հիմնավորումների մակարդակի համար»։ Այնուհետև նախկին «երիտբարեփոխիչին» տրված խիստ գնահատականը թերթը հիմնավորել է Հրանտ Բագրատյանի վաչապետության ժամանակ արված քայլերի և դրանց արդյունքների վերլուծությամբ, գտնելով, որ «եթե չլինեին այդ կործանարար սխալները, ներկա շատ պրոբլեմներից կարելի էր խուսափել» («Բագրատյանն առաջարկում է կրկին ըմբոշխնել իր տնտեսագիտական տեսությունների ողջ հմայքը»)։
«168 ժամը» ներկայացրել է քաղաքացի Հարություն Առաքելյանի հարցերը՝ ուղղված ՀՀ վարչապետ Տիգրան Սարգսյանին։ «Օրակարգը» հավելել է, թե «ՀՌԱԿ ատենապետ Հարություն Առաքելյանն անհավասար մարտի մեջ է մտել իշխանության հետ»՝ հընթացս դա համարելով նաև ոչ պատահական՝ «Պատվավոր աքսորականի հաջորդ թեկնածուն»։
«Երկիրը» կարագի փոխարեն բուսասերուցքային սփրեդ վաճառելու համար 10 տնտեսվարողներին տուգանելու վերաբերյալ ՏՄՊՊ հանձնաժողովի կայացրած որոշումը դարձյալ ենթարկել է լրագրողական վիճարկման՝ «Ի՞նչ է տալու 3մլն դրամ տուգանքը»։ «Հայոց աշխարհը», անդրադառնալով կառավարության կողմից խորհրդարան ներկայացված օրենսդրական փոփոխությանը, ըստ որի ի թիվս այլ ապրանքների, «10 տոկոսանոց մաքսատուրք է նախատեսվում նաև ներմուծվող գրքերի և մամուլի վրա», հարցրել է. «Այսպե՞ս ենք դիմավորում տպագրության 500-ամյակը»։