ուրբաթ, 9 դեկտեմբերի 2011
Բազմակարծության ելևէջները
«Հայաստանի Հանրապետությունը», երեկ խորհրդարանում ընդունված 2012թ. պետական բյուջեի նախագծի վերաբերյալ տարբեր հանձնաժողովների, խմբակցությունների, գերատեսչությունների ներկայացուցիչների տեսակետները ներկայացնելով, միաժամանակ նշել է, որ ԱԺ-ն ավարտել է աշնանային նստաշրջանի աշխատանքը: Ֆինանսական գլխավոր փաստաթղթի ընդունման թեմային «ըստ յուրո» անդրադարձել են նաև «Օրակարգը» («Գնացին Ամանորի»), «Երկիրը» («Վիճելի օրինագիծը «զոռով» ընդունեցին»), «Հայկական ժամանակը» («Հերթական խայտառակությունը ԱԺ-ում»), «Ժամանակը» («Կոալիցիան` ապակայունացման աղբյուր»): «Հրապարակը», թերևս ավելի օրիգինալ երևալու մղումով, ԱԺ երեկվա աշխատանքին «նվիրել է» մի ամբողջական էջ և երկու «երկարաշունչ» խորագիր. «Խորհրդարանի և կառավարության վախճանը» և «Պատգամավորները բոյկոտեցին կառավարության բյուջեն»:
Նշելով բանկային համակարգի միջոցով արտերկրից «Հայաստան մտնող» մասնավոր` «ոչ առևտրային բնույթի» տարեկան փոխանցումների և կանխիկ գումարների ծավալների մասին, «Հայոց աշխարհը» հարցրել է, թե «Տրանսֆերտնե՞րն են ավել, թե բյուջեն», նաև կարևորել, որ թեև «ներհոսող գումարները ոչ միշտ են արդյունավետ ակումլյացվում տնտեսության կողմից», սակայն դրանք էական ազդեցություն են ունենում «տարբեր գործընթացների և, առաջին հերթին, երկրի սոցիալական իրավիճակի վրա»:
«Օրակարգը» վերստին հիշեցրել է, որ «կանոնակարգիչ գիլյոտին» ծրագրի դերը գործող օրենքներին և ազատ շուկայի սկզբունքներին հակասող ակտերի վերանայումն ու զտումն է ու կառավարման արդյունավետության մակարդակի բարձրացումը, նաև տեղեկացրել, որ այդ նպատակով «Ավստրիայի զարգացման գործակալությունը» կառավարությանը տրամադրելու է 500 հազ. եվրո գումար: «Հայկական ժամանակին» դա ներկայացել է» որպես «կես միլիոնանոց գիլյոտին»:
«Էյ ընդ ԵՄ ՌԵՅՐ» ընկերությանը Կոտայքի մարզի Արտավազ գյուղի մոտ գտնվող անտառահատվածի անհատույց և անժամկետ տրամադրման մասին կառավարության որոշումը «Ժողովուրդը» որակել է նվիրատվություն` սաուդցի շեյխ Մոհամադ Մուսալամին: «Օրակարգը» այդ առիթով հարցրել է ` «Կոտայքի անտառներում սաուդական հյուրանո՞ց»: «Ժամանակը» փորձել է պարզել, թե Եվրոպայի ժողովրդական կուսակցությանը անդամակցության հարցում «Ինչու անտեսեցին Բարգավաճին», «Ժողովուրդը»` ըստ իր «բազմանշանակ» վերլուծության ձգտել հասկանալ, թե ինչպես է «ՀՀԿ-ն ջանում մեծամասնություն ստանալ մայիսին»:: Նշելով, թե իբր Հայաստանի «Էլեկտրական ցանցեր» ՓԲ տնօրեն Եվգենի Բիբինը ստիպում է աշխատանքի ներկայանալ նաև ոչ աշխատանքային օրերին (տոն, մեռելոց), «Հայացքը» խորհուրդ է տվել «բռնել մարդու թևից» և ասել. «Այ ընկեր… հարգիր այս երկրի օրենքներն ու որոշումները…»:
