հինգշաբթի, 15 դեկտեմբերի 2011
«Ինչու»-ի և «ինչպես»-ի ժամանակը
«Առավոտը», տեղին համարելով «Ամանորին ընդառաջ» փորձել ամփոփել տնտեսական տարվա արդյունքները «փաստացի իրավիճակով», գնահատելի է համարել արտարժույթի կայուն փոխարժեքի, հուսալի դրամավարկային համակարգի առկայությունը, «գնաճի ոչ թռիչքաձև զարգացումների» և «նախատեսվածից ավելի հարկային մուտքերի» առկայությունն ու «սոցիալական ծրագրերի անխափան կատարումները», սակայն նաև արտահայտել է իր մտահոգությունը, թե «տնտեսական ցնցումների փոթորկալից վտանգը… կախված է», և առաջարկել տնտեսության զարգացման «թիրախային մոտեցումները» փոխարինել «համապարփակ զարգացման ծրագրերով»` «խթանելով հայրենական արտադրությունը»: Կառավարության մշակած` արտահանմանն ուղղված արդյունաբերական քաղաքականության ռազմավարական ծրագրի վերաբերյալ հրապարակման մեջ «Հայկական ժամանակը», ինչպես պատահում է որպես կանոն, «ոչ մի լուսավոր կետ չի նշմարել և այն որակել է «հերթական բլեֆ»: Թեմային անդրադարձել է նաև «Օրակարգը», նշելով, որ թերթի որակմամբ` «Առանց «ինչպես»-ի պատասխանի» ծրագիրը, որ «վերջին շրջանում ամենամեծ աղմուկ հանած ծրագրերից մեկն է», քննարկվելու է այսօրվա կառավարության նիստում:
«168 ժամը» գրել է, թե իբր «տնտեսական տարին ոչնչով աչքի չընկավ. մի այլ հրապարակման մեջ թերթը (նաև «Օրակարգը»), ներկայացրել է ԱՄՀ մշտական ներկայացուցիչ Գիերմո Տոլոսայի գնահատականը, որ «ԱՄՀ-ում ցանկանում են, որ Հայաստանի իշխանությունները արագացնեն տնտեսությունում իրականացվող բարեփոխումների տեմպերը», քանի որ «Հայաստանն այլևս չի կարող հանդուրժել առկա բիզնես միջավայրը»:
«Օրակարգի» փոխանցմամբ ՊԵԿ-ը նորից «ցանկանում է… ներկայացուցիչներ ունենալ խոշոր հարկ վճարողների մոտ» և շարունակում է «անցյալ տարվա պրակտիկան», «Երկիրի» մեկնաբանությամբ` տաքսու ծառայությունների ոլորտում առկա թերությունների հետևանքով հարյուրավոր միլիոնների վնաս է հասցվել պետբյուջեին:
«Հայոց աշխարհը» գրել է, որ «տարեսկզբի բարձր գնաճից հետո» այն «վերադարձել է նախատեսված միջակայք» և «առնչվում է հիմնականում առաջին անհրաժեշտության ապրանքներին»: «Օրակարգի» վկայությամբ վարչապետ Տիգրան Սարգսյանը Դիլիջանում ՊԵԿ-ին հող հատկացնելու հարցը, որի մասին նախօրեին գրել էր պարբերականը, հանել է կառավարության նիստի օրակարգից:
