չորեքշաբթի, 25 հունվարի 2012
Նախարարների ժամանակը
Տպագիր լրատվամիջոցներում ամենաշատը հիշատակվել է էկոնոմիկայի նախարարը: Պատճառը երեկվա մամուլի ասուլիսն է. «Չի կարելի ասել` կամ տուրիզմ, կամ հանքարդյունաբերություն, տնտեսության զարգացմանը երկուսն էլ անհրաժեշտ են» («Հայաստանի Հանրապետություն»), «Անցնում ենք ակտիվ արդյունաբերական քաղաքականության» («Հայոց աշխարհ»), «Տաք-տաք երկաթի հույսին. էկոնոմիկայի նախարարությունը չգիտե` Հայաստանի համար որն է մետաղի օպտիմալ գինը» («Օրակարգ»), «Խորհրդի բարձրագույնը. դե զարգացիր, էլի, ա′յ արդյունաբերություն» («ՀԺ»): «Ժողովուրդը» էկոնոմիկայի նախարարի ասուլիսը ծառայեցրել է ընդամենը իբրև տեղեկատվական առիթ. իրականում «Հերթական խոստումների շարքից» հոդվածի հերոսներն ու մեկնաբանները ՀԱԿ տնտեսագետ Վահագն Խաչատրյանը և ՀՅԴ տնտեսագետ Արծվիկ Մինասյանն են: Ավելին, այս թերթը չի բավարարվել միայն մեկ նախարարի գործունեության լուսաբանմամբ և հոդվածներ է նվիրել սոցապ («Ես ԲՀԿ-ի կողքին եմ ու կմնամ») և մշակույթի («Նենց վատ ա մշակույթի վիճակը, տիկին նախարար») նախարարներին:
«Իրավունքը» նախկին վարչապետ Հրանտ Բագրատյանի հետ զրույցից հետո հանգել է այն եզրակացության, որ «2012-ին դրամի արժեզրկման միտումներն ավելի ցայտուն կարտահայտվեն», միաժամանակ, ներկայացնելով Բագրատյանի հայտարարությունը, թե «Հայաստանաբնակ գործարարները լուրջ ակտիվներ են ձեռք բերում դրսում և զարգացնում այնտեղի տնտեսությունը», նշել, որ «կապիտալի արտահոսքի դեմն առնելը» պետք է լինի «պետության հիմնական խնդիրներից մեկը»: «Առավոտը» որպես առողջապահության համակարգի այլընտրանքային ֆինանսավորման աղբյուր առաջարկել է «Վորլդ Վիժն Հայաստան» կազմակերպության դիտարկումը. «ծխախոտի և ալկոհոլային խմիչքների ակցիզային հարկերը բարձրացնել և… ավելացված գումարն ուղղել վերոհիշյալ ոլորտին»: «Օրակարգը» գրել է, որ ՏՄՊՊ հանձնաժողովը տուգանել է պարարտանյութ ներկրող «Քեթրին գրուպ»-ին, «Հայացքը», թերևս մեղմ համարելով տուգանքի չափը (10մլն դրամ), հռետորաբար հարցրել է. «Պատճառն ի՞նչն է, եթե ոչ` կոռուպցիան»:
Ինչպես միշտ, զգալի տեղ է գրավում կուսակցական նախընտրական թեման: «Հրապարակը» արձանագրում է, որ «մեր երկիրն այլևս չի կարող իր ուսերին կրել ևս մի կեղծված ընտրություն», նաև ներկայացնում ՀՀԿ նախընտրական շտաբում տեղի ունեցած «որոշակի դերաբաշխումը», ըստ որի ՀՀԿ շտաբի ղեկավարը դեմ է, որպեսզի նախարար Աշոտյանն ակտիվորեն ներգրավվի նախընտրական աշխատանքներում, քանի որ նրան համարում է «վարչապետի թիմի ներկայացուցիչ»:
«Ժամանակն» իր հերթին վճռված է համարում Ռոբերտ Քոչարյանի, Վարդան Օսկանյանի և Կարեն Կարապետյանի ընդգրկումը ԲՀԿ համամասնական ցուցակ:
