Հայաստանի Հանրապետության Կառավարություն

«Ժողովուրդի» թղթակցի աչքից չի վրիպել, թե ինչպես ՀՀԿ գործադիր մարմնի երեկվա «գիշերային նիստից» առաջ Երևանի քաղաքապետը, ԿԳ նախարարը և ՀՀԿ երիտասարդական թևի առաջնորդը «շենքի մոտ հանգիստ ծխելուց հետո» ծխախոտի մնացուկները նետել են «ոչ թե աղբարկղ, այլ պարզապես մայթին»: Հաջողությամբ չի պսակվել «ՀԺ»-ի փորձը` զրույցի բռնվել վարչապետի հետ. նա «ինչ-որ հարց» է քննարկելիս եղել ԱԺ նախագահի հետ և թերթի թղթակցին տեսնելուն պես չի ընդհատել զրույցն ու գոհացրել նրա հարցասիրությունը, մի բան, որը հարուցել է «ՀԺ»-ի դժգոհությունը:
Երևանյան հոգսերով է տոգորված «Ազգի» «Հին Երևանը` 3 տարում» թղթակցությունը, ուր շարադրվում է Մաշտոցի պողոտայի հարակից այգու թնջուկի հանգուցալուծման կառավարության տեսլականը:
Հրապարակումների պատկառելի մասը, անշուշտ, նախընտրական հոգսերի արտացոլումն է: «Առավոտի» հարցերին պատասխանում է Ռազմիկ Զոհրաբյանը («Հավատալու և փոխելու ցանկությունը որևէ մեկի մենաշնորհը չէ»), «Ժամանակը» զարկ է տալիս ընտրացուցակների կազմման գաղտնիքների բացահայտմանը, «Հայացքը» պնդում է, որ «ՀՀԿ համամասնական ընտրացուցակում», բացի ՀՀ նախագահից, «երեք հոգի ևս քվոտաներ ունեն», և այդ թվում է վարչապետը, «Երկիրի» վերլուծականում այն միտքն է արծարծվում, թե «նախագահը ձգտում է, ի դեմս Տիգրան Սարգսյանի, փորձարկել իր հնարավոր «ժառանգորդի» տարբերակը»:
«Ժողովուրդը» ընթերցողին է ներկայացնում վարչապետի ֆեյսբուքյան պատի որոշ դրվագներ, «Օրակարգը», արձանագրելով Հայաստանի «երևանիզացիայի և մարզերի ամայացման» խնդիրը, առաջարկում է այն լուծել «տեղական էլիտաների» ակտիվության միջոցով:
«Երկիրը» շարունակել է իրականացվող սոցիալ-տնտեսական փոփոխությունների ու դրանց արդյունքների վերաբերյալ ՀՀԿ համագումարում ՀՀ նախագահի ելույթի «սեփական մեկնաբանությունը»` «Իմ հայրենիքը տեսե՞լ ես, ասա»: Նույն ելույթը իր հանգույն փորձել է վերծանել նաև «Ժամանակը», վաղօրոք «մի պահ մոռանալով» Բագրատյանի արձագանքը («Երազանքի ոգին ու ողբերգության մարմինը»), սակայն թերթի ութերորդ էջում, այդուհանդերձ «վերադառնալով Բագրատյանին», գրել, թե իբր վերջինիս ուղղված ՀՀԿ-ական խորհրդարանական Արտակ Դավթյանի «պատասխանը վկայում է, որ ՀՀԿ-ն… պատասխան առայժմ չունի»:
«Հայկական ժամանակը» հայտարարել է, թե անցած տարվա դեկտեմբերին «Արտոնագրային վճարների մասին» ՀՀ օրենքում կատարված փոփոխությունները «լուրջ հարված են հասցնելու հատկապես փոքր բիզնեսին», նաև «ակնարկել», թե իբր «հնարավոր է` օրենքի գործողության մեջ մտնելու ժամկետը հետաձգվի»:
Ըստ «Հայոց աշխարհի» «Կենտրոնական բանկը նվազեցրել է իր միջամտությունը» արժութային շուկայում, նաև «կարծես հակված չէ թույլ տալու ազգային արժույթի արժեզրկման տեմպի արագացում»: Մի այլ հրապարակման մեջ թերթը նշել է, որ «այս տարի ևս կառավարությունը կշարունակի սուբսիդավորել գյուղվարկերը», և «ֆինանսական հատկացման շրջանակներում սուբսիդավորումը նախատեսվում է սկսել ապրիլից»: «Օրակարգը» տեղեկացրել է, որ ՄԱԿ-ի` էլեկտրոնային կառավարման մասին զեկույցում «Հայաստանը «առաջընթաց ունի» և, «դիրքերը 2010թ. համեմատ բարելավելով 16 հորիզոնականով», 193 երկրների շարքում զբաղեցնում է 94-րդ տեղը: