Հայաստանի Հանրապետության Կառավարություն

«Խոսուն է» ընտրությունների վերահսկման միասնական շտաբի ստեղծումը «նշանակալի իրադարձություն» համարող «Ժամանակի» հրապարակման խորագիրը` «Միասնաբար` ընդդեմ ՀՀԿ-ի»: «Հայկական ժամանակը» ՕԵԿ կանանց միության յոթերորդ համագումարում ՕԵԿ կուսակցության փոխնախագահ Հեղինե Բիշարյանի հայտարարությունը որակել է «սկանդալային», «Հայացքը»` ուղղակի այն դարձրել հրապարակման խորագիր` «ՕԵԿ-ում կանայք շատ են` ի դեմս Արթուր Բաղդասարյանի»:
«Հրապարակը» «կադրային շարժերի» մասին իր «տեղեկություններից» մասհանելով նշել է, թե «խորհրդարանական ընտրություններից հետո ՀՀԿ շտաբի պետ Հովիկ Աբրահամյանը կարող է զբաղեցնել Ազգային անվտանգության խորհրդի քարտուղարի պաշտոնը», «պաշտոնի բարձրացում է սպասվում» նաև ՕԵԿ նախագահ Արթուր Բաղդասարյանին, «Հայկական ժամանակը»` ներկայացրել «կոալիցիոն ուժերի ցուցակներում ընդգրկված պաշտոնյաների ցուցակը»` «Կառավարման համակարգն արձակուրդում է»:
Ռուսական «Կոմերսանտ» թերթի թղթակցի հետ զրույցում Հայաստանում ռուսական ռադիոտեղորոշիչ կայան հիմնելու վերաբերյալ ՀՀ վարչապետ Տիգրան Սարգսյանի դիտարկմանը «ըստ ճաշակի» արձագանքել են «168 ժամը» («Մնաց հանրապետության հրապարակը»), «Ժամանակը» («Գաբալա-Հայկական տարածք. Տիգրան Սարգսյան-Ռոբերտ Քոչարյան` ինչ կընտրի Ռուսաստանը» և «Բլեֆատեղորոշիչ կայանի անհրաժեշտություն») և «Օրակարգը» («Ֆորպոստի հարմարությունները»): «Օրակարգը» նշել է, որ անցյալ տարի Հայաստանում արձանագրված 4.6 տոկոս տնտեսական աճը այնքան է, «որքան կառավարությունը ծրագրել էր» («Հաշվել սովորելը ստացվել է»), նաև, մի այլ հրապարակման մեջ («Նավթադոլարներ դեպի Հայաստան») հավելել, թե ըստ ԿԲ վիճակագրության տրանսֆերտների աճը, այդուհանդերձ, «չի օգնել կանխելու դրամի արժեզրկումը»: «Հայկական ժամանակը» գրել է, որ «բենզինի երեկվա թանկացումը այս տարվա ընթացքում արդեն չորրորդ անգամն է» և գուշակել` «Բենզինը էլի կթանկանա»: «168 ժամը» «կանխատեսել» է, թե «խորհրդարանական ընտրություններն արդեն թողնում են իրենց ազդեցությունը տնտեսության վրա, քանզի «առաջադրված օլիգարխները` որպես խոշոր ներկրող ու արտադրող, հասկանում են, որ գնաճը զսպելը իրենց անձնական շահերից է բխում»: «Հայացքը» ահազանգել է, թե Արարատի մարզի սառնարաններում պահեստավորված մեծ քանակությամբ «խաղողը նեխում է» և հարցրել` «Ո՞վ է մեղավոր, որ վրացիները հրաժարվում են հայկական խաղողից»: «168 ժամը» ներկայացրել է ըստ տնտեսության հատվածների ու տնտեսական գործունեության տեսակների միջին անվանական աշխատավարձերի չափերը` ի մասնավորի «քննության առնելով» բուհական համակարգի աշխատողների վճարների հիմնախնդիրները` «Չգնահատված դասախոսների երկիրը»: