Հայաստանի Հանրապետության Կառավարություն

Բրյուսովի անվան համալսարանի ռեկտորը, ով նաև Եվրախորհրդի կառույցներից մեկի փորձագետների կոմիտեի անդամ է, այդ կոմիտեի լիագումար նիստին մասնակցել, ուստի և Հայաստանից բացակայել է առանց ՀՀ ԿԳ նախարարի թույլտվության և պատժվել խիստ նկատողությամբ: Ռեկտորը, իր խոսքով, առաջնորդվում է «նախարարի մասին կամ լավ, կամ ոչինչ» սկզբունքով: Սակայն «Առավոտի» հարցերին պատասխանելիս նա ոչ միայն ոչ մի լավ բան չի ասել նախարարի հասցեին, այլև հայտնել է, որ դիմելու է վարչապետին, «որպեսզի նա նախ` վերացնի նշված հրամանը և որոշի պարոն Աշոտյանի հետագա պաշտոնավարման նպատակահարմարությունը»:
Մամուլի տարածքի զգալի մասը ապրիլի 8-ին ծայր առած ընտրական քարոզչության արտացոլումն է. «Ի՞նչ ծրագրերով ու խոստումներով են կուսակցությունները գնում ընտրության», «ԲՀԿ-ն որպես իրավիճակի ախտորոշում» («Ժամանակ»), «Պոեզիայի ժամ», «Ընտրություններն ու գները» («168 ժամ»), «ՀՀԿ-ն փնտրում է կեղծիքների «հովանավոր» («Երկիր»): «Առավոտի» երաժշտական մեկնաբանը պարզել է, թե «Ինչ երգ «կերգեն» քաղաքական ուժերը քարոզարշավին», իսկ «Հրապարակի» հեղինակը երկու օրում հասցրել է նյարդայնանալ քարոզչական գրոհից. «Ե՞րբ է ավարտվելու էս մղձավանջը»:
«Ժողովուրդը» ընթերցողին զգուշացնում է, որ ՀՀ երկրորդ նախագահը պատրաստվում է «առաջիկայում հանդես գալ նախընտրական հայտարարությամբ»: Այս թերթի թղթակից մի տիկին խմբագրությանը տեղեկացնում է, որ Սուրբ Զատկի տոնի կապակցությամբ ՀՀԿ-ի տված 30 հատ ձուն ժամկետանց էր և հիշեցնում, որ նման մի բան էլ Նոր Տարվա նախաշեմին էր եղել, բայց այն ժամանակ տրվածը ոչ թե ձու էր, այլ ձեթ: Տիկինը սկզբում չի նկատում, որ ձուն ժամկետանց է, մի 5 հատը ձվածեղ է անում, ուտում ու… թունավորվում: Նամակի վերջում նա խնդրում է, որ թերթն իր անունը չնշի, քանի որ կարող են «վնաս տալ» իրեն:
Որոշ լավատեսություն են ներշնչում «Հայոց աշխարհի» «Ավանդները թանկանում են, վարկերը` էժանանում», «Առավոտի» «Գյումրու օդանավակայանը` էժան ավիափոխադրումների կենտրոն» հոդվածները: «Դելովոյ էքսպրեսը» ոչ միայն նկատել է, որ Դեմիրճյան կենտրոնում այս օրերին կազմակերպված ցուցահանդեսը կրկին ի հայտ է բերել մի շարք խնդիրներ, այլև «Ֆլեշի» փոխտնօրենի բերանով զգուշացրել, որ «բենզինի գինը կարող է ավելի բարձրանալ»:
Մամուլը չի շրջանցել նաև «գլոբալ» խնդիրները. «Հայաստանին ի՞նչ կարող է տալ համաշխարհային մաքսային կազմակերպությունը» («Իրավունք»), «Եվրասիական նախագծի խնդիրներն ու նպատակները» («Գոլոս Արմենիի»):