Հայաստանի Հանրապետության Կառավարություն

Հերթական ընտրությանը վաղօրոք ճակատագրական, նույնիսկ օրհասական իմաստ ու նշանակություն տալը բնորոշ է հայորդիներիս: Ապացույցը երեկվա հանրահավաքն է եղել և ՀԱԿ առաջնորդի 1ժ. 20 րոպեանոց ելույթը («ՀԺ»): Բայց ահա քաղաքական այս ուժի գործելակերպը Թատերականի ռեկտորն անվանում է «մուտիլովչիկություն», «քուչայական քաղաքականություն». մեջբերելով Արմեն Մազմանյանի այս և մյուս խոսքերը, «Հրապարակը» չի մոռանում ընթերցողին հիշեցնել, որ նա վերջերս է իր պաշտոնն ստացել և «շատ մտերիմ» է ՀՀ վարչապետի հետ: «Ժամանակը» նախընտրական ոլորտից առանձնացրել է ԲՀԿ առաջնորդի այն հայտարարությունը, թե «Վարդան Օսկանյանի` իշխանություններին ուղղված քննադատությունը նրա անձնական կարծիքն է»: Սա արդեն թերթին ոչ միայն ծիծաղելի, այլև տխուր է թվում…
Նախընտրական թեման այսօր նույնպես միահյուսված է տնտեսականին: ՀՀԿ անդամ, ՀՀ էկոնոմիկայի նախարարի առաջին տեղակալ Կարինե Մինասյանն, օրինակ, «Գոլոս Արմենիին» հայտարարել է` «ՀՀԿ-ն ապացուցել է, որ գիտե երկիրը դուրս բերել ծանր վիճակից» և կոնկրետ օրինակներով ապացուցել է իր ասածը: «Հայաստանի Հանրապետությունը» «Գյուղի և գյուղատնտեսության տեսլականը» ընթերցողին է ներկայացրել «ըստ խորհրդարանի ընտրությանը մասնակցող քաղաքական ուժերի»: «Երկիրը» լուսաբանել է 9 քաղաքական ուժից 7-ի բանավեճը փոքր և միջին ձեռնարկատիրության «փրկության» ծրագրերի վերաբերյալ: Լրագրողական գրեթե նույն «բանալին» է կիրառել «Հրապարակը»` «Տնտեսական շաբաթ կամ ինչո՞ւ չեն հարգում ընտրողին»: Այնուհետև լրատվամիջոցները քննարկել են ԱՎԾ ներկայացրած եռամսյակի մակրոտնտեսական ցուցանիշները. «Մարտին տնտեսական ակտիվության 6.6 տոկոս աճ, արտահանման ծավալի կտրուկ ավելացում» («Ազգ»), «ԱՎԾ-ն արդեն «փոխվել» է» («168 ժամ»), «Էլի տնտեսական հրաշք» («ՀԺ»), «Հանքերը միանգամից արտահանենք» («Երկիր»), «Տնտեսական ակտիվությունը շարունակում է բարձր մնալ» («Հայոց աշխարհ»): Հայաստանի մետաղագործության վեկտորներն է ուրվագծել «Գոլոս Արմենիին»:
Բրյուսովի անվան համալսարանի թեմայից առանձնացրել ենք երկու նյութ` «Կրթության և գիտության «ֆեյսբուքություն» («Հրապարակ») և «Զոլյանը չի ասում` ինչ է քննարկել ՀՀ նախագահի հետ» («Առավոտ»): Ռեկտորը ցանկություն է հայտնել, որ կրթօջախի շենքի օտարումը ժխտող հայտարարություն անի նաև ՀՀ վարչապետը:
«Ազգը» տպագրել է ԵՊՄՀ կազմակերպած միջազգային գիտաժողովին նվիրված հատուկ հավելված: