շաբաթ, 12 մայիսի 2012
Հետընտրական թվաբանություն
«168 ժամը» տեսնում է հետընտրական գնաճի նախանշանները, այդ թվում «ավելի լուրջ, ավելի պաշտոնական ցուցանիշը` դրամի «սրընթաց արժեզրկումը»: «ՀԺ»-ն դրան գումարում է այլ հիմնախնդիրներ` «Ինչո՞ւ է աճում արտագաղթը, ինչո՞ւ են ավելի քիչ երեխաներ ծնվում, ինչո՞ւ են նվազում անշարժ գույքի գները», «Երկիրը» տրտնջում է` «Այս երկրում միայն պարտքերն են աճում»: «Հայոց աշխարհն» իր հերթին հավաստում է, որ «հիպոթեկի շուկան շարունակում է պասիվ մնալ»: Այս թերթը նաև նշում է այն հիմնական խնդիրները, որոնց լուծմանը «արագորեն պետք է ձեռնամուխ լինի հաջորդ կառավարությունը»` զբաղվածության ցուցանիշի էական բարելավում և իբրև հետևանք` արտագաղթի աստիճանական մարմանը նպատակաուղղված քաղաքականություն, մրցակցային հավասար դաշտի ապահովում, արդյունաբերական, ներդրումային կոնկրետ ծրագրերի խթանում:
Պատգամավորի մանդատից հրաժարվելու Արամ Սարգսյանի որոշումը տարատեսակ մեկնաբանությունների առիթ է տվել: Այդ իրողությանն արձագանքել են գրեթե բոլոր թերթերը` «Ո՞ւր է գնում «Հանրապետությունը» («ՀԺ»), «Խորհրդանշական թվեր» («168 ժամ»): «Ժողովուրդը» («Հայ ազգային կոնգրեսը փլուզվում է») և «Երկիրը» («ՀԱԿ-ը կազմաքանդվում է», «Ընդդիմության վերափոխո՞ւմ, թե փոշիացում») չեն բացառում, որ Արամ Սարգսյանի օրինակին կարող է հետևել նաև Ստեփան Դեմիրճյանը:
Լրատվամիջոցների համար հրատապ է ՀՀԿ-ԲՀԿ հնարավոր կոալիցիայի լինել-չլինելու հարցը: «ԲՀԿ-ն կերկատվի՞» հարցնում է «Ժամանակը»` ակնարկելով, որ «այսպես կոչված «Օսկանյանի թևը» որդեգրել է առավել ընդդիմադիր կեցվածք: Սակայն ԲՀԿ-ն` «փողի աստվածության, ոսկե ցլիկի շուրջ համախմբված այդ զանգվածը» որպես ընդդիմություն դժվարանում է պատկերացնել Կարապետ Ռուբինյանը («Ժամանակ»): «Ժողովուրդի» տեղեկացմամբ ԲՀԿ առաջնորդը երեկ կուսակտիվի հավաք է հրավիրել և հայտարարել, որ «բոլոր այն ընտրատեղամասերի պատասխանատուները, որոնք 10 հազար ձայնից քիչ են հավաքել կուսակցության համար, ԱԺ պատգամավորի մանդատ չեն ստանա»` «ԲՀԿ-ից «քցվածները»: «Կենտրոն» հեռուստաընկերությունը 1մլն դրամ տուգանելու ՀՌԱՀ որոշումը «Ուրվագիծ» հաղորդաշարի հեղինակ Պետրոս Ղազարյանը գնահատել է իբրև «Կենտրոնն» արտոնագրից զրկելու գործընթաց»:
