ուրբաթ, 18 մայիսի 2012
«Համբերանքի չիբուխը»
Ըստ երևույթին լրատվամիջոցներն այսօր էլ պետք է համբերեն և հերթական անգամ ապավինեն իրենց երևակայությանը, թե ինչն ինչոց է լինելու: Այդպես էլ վարվել են. «ՀՀԿ-ն դեռևս վերջնական որոշում չի կայացրել» («Առավոտ»), «Ոչինչ հայտնի չէ, ոչինչ որոշված չէ» («Հրապարակ»), «Ծառուկյանը համառո՞ւմ է» («ՀԺ»), «Ինչ գիտեն Սարգսյանն ու Ծառուկյանը» («Ժամանակ»), «Որոշեցին որոշել հետո» («Ժողովուրդ»): Ըստ «Հրապարակի», ՀՀԿ շտաբի պետը կուսակցության գործադիր մարմնի երեկվա նիստին չէր մասնակցում ոչ թե հիվանդության պատճառով, այլ որովհետև գիտեր` «նիստում ոչ մի էական բան չի լինելու»:
Կառավարության նիստը ևս սովորականից «ճոխ» է լուսաբանվել: Հատկապես մեծ արձագանք է ստացել վարչապետի խոսքը` ուղղված կառավարության և կենտրոնական բանկի գործունեության քննադատներին. «Ըստ վարչապետի` Հայաստանի մակրոտնտեսական կայունությունն ամրապնդվել է» («Ազգ»), «Մի քաղաքականացրեք բանավեճը» («Ռեսպուբլիկա Արմենիա»), «Ընդդիմախոսները բարկացրել են վարչապետին» («Հայացք»), «Վարչապետին միայն «Մուդիսն» է հասկանում» («Հրապարակ»), «Մի′ կողոպտեք» («Երկիր»), «Հելլոոո, «Moody`s» («ՀԺ»): Տպագիր մամուլում տեղ են գտել նաև Հրանտ Բագրատյանի («Կայուն հետամնաց»- «Ժողովուրդ») և Վարդան Օսկանյանի («Քննադատության քննադատության քննադատություն»- «Օրակարգ») արձագանքները. հավանաբար այս գործիչները իրենց վրա են վերցրել վարչապետի թափանցիկ ակնարկը տրված գնահատականների անգրագիտության վերաբերյալ: Քննարկված մյուս հարցերից թերթերը ուշադրություն են դարձրել կուտակային համակարգի ներդրման` «Գործադիրը հաստացնում է թոշակները» («Օրակարգ»), «Արփա-Սևան» ջրատարի 2-րդ թունելի հիմնանորոգման («ՀԺ») և այլ խնդիրների: Շարունակում է հրատապ մնալ դրամի արժեզրկման փաստը` «Եվրոն և ռուբլին արժեզրկվում են, դոլարը` արժևորվում» («Հայոց աշխարհ»), «Եվրոպան քաշում է իր հետևից» («Դելովոյ էքսպրես»): Այս թերթը ռուսական «Վեդոմոստիից» արտատպել է վարչապետի «Հայաստանի հայացքն ուղղված է Եվրոպային» հրապարակումը: Վարդան Այվազյանն էլ, պատասխանելով «ԴԷ»-ի հարցերին, նշում է. «Ավելի լավ է վերահսկողությունը կենտրոնացնել 3 հազար այն գործարարների վրա, ովքեր ապահովում են բյուջեի եկամտի 90 տոկոսը»:
Արժեթղթերի շուկայի զարգացման հնարավորությունն է քննարկում «Ռեսպուբլիկա Արմենիան»` «Փողի պաշարի հզոր հոսքը սարերի հետևում չէ, պետք է այսօր աշխատել, որպեսզի վաղը այն իրականանա»: Իսկ ահա «ֆեյսբուքահայության» որոշ ներկայացուցիչներ Հայաստանի տնտեսության չարիք համարում են «ՆՄԱՆ բանկային համակարգ ունենալը` գլխից դուրս տոկոսներ, ու բիզնեսի զարգացման ոչ մի տրամաբանություն («Հրապարակ»):
