երեքշաբթի, 29 մայիսի 2012
«Բուռն» իրադարձությունների ակնկալիքով
Ըստ «Հայկական ժամանակի» մայիսի 31-ին տեղի ունենալիք նոր ձևավորված խորհրդարանի աշխատանքային առաջին օրը կլինի «բավականին բուռն», քանի որ գործող կառավարությունը «վայր է դնելու լիազորությունները», «կընտրվեն ԱԺ նախագահ, 2 փոխնախագահներ և այլն» («Անխոցելի պատգամավորներ, հավատացեք, չկան»): «Կոալիցիայի ու պաշտոնների շուրջ» իր մտքերը «Ժողովուրդը» սկսել է շարադրել նրանով, թե «իշխանական ճամբարում դեռևս անորոշ վիճակ է, վերջնականապես հայտնի չէ, թե առաջիկայում ինչպես են բաշխվելու կառավարական պորտֆելները», ապա, մի այլ հրապարակման մեջ, շարունակել, թե իբր այս օրերին «հայրենի կառավարության անդամների մեծ մասը ճամպրուկային տրամադրության մեջ է»: «Հրապարակը» չի դադարել «խորհրդածել» ՀՀԿ-ԲՀԿ «հետընտրական հարաբերությունների» շուրջ («Շարունակելու ենք գուշակել` կգա՞, չի՞ գա, կգա՞, չի՞ գա»):
«Հայաստանի Հանրապետության» փոխանցմամբ մայիսի 29-ին ՀՀ վարչապետ Տիգրան Սարգսյանն այցելել է Գյումրիի «Մուշ 2» թաղամաս, ծանոթացել կառուցվող բնակարանների շինաշխատանքների որակին: Այցին արձագանքել է նաև «Ժողովուրդը» («Շրջայց Գյումրիում»), «Հայկական ժամանակը»` շարունակել Գյումրիի քաղաքապետի մեքենայի օգտագործման մանրամասների վերաբերյալ նախորդ համարում սկսած իր պատումը:
«Ժողովուրդը» ներկայացրել է ֆեյսբուքյան իր էջում ՀԱԿ խորհրդարանական Հրանտ Բագրատյանի նկատառումները դրամի արժեզրկման հետևանքների վերաբերյալ` «Դոլարի աճը կբերի գնաճի»: Դրամի փոխարժեքի տատանումների թեման չի շրջանցել «Հայկական ժամանակը» («Հաստ ու բարակ մի գին է»), որը մի այլ հրապարակման մեջ էլ, նկատի առնելով հանրահայտ «Փակ շուկայում» իրականացվող աշխատանքները, հայտարարել է` «Շուկան քանդում են»: «Ժամանակը» գրել է, որ մայրաքաղաքի «լավագույն ճարտարապետական կառույցներից մեկը» համարվող` «Փակ շուկայից» այսօր «մնացել են միայն մի քանի պատեր» և հարցրել` «ովքե՞ր են պատասխանատուները»:
