Հայաստանի Հանրապետության Կառավարություն

«Հայաստանի Հանրապետությունը» ներկայացրել է կառավարության ծրագրի վերաբերյալ ԱԺ ՀՀԿ խմբակցության անդամ Խոսրով Հարությունյանի տեսակետը՝ «Կառավարության ծրագիրը քաղաքական փաստաթուղթ է» և «համապատասխանում է երկրում առկա խնդիրներին». «Առավոտին» առավելապես հետաքրքրել է ԲՀԿ-ին ուղղված «ՀԱԿ-ի սիրաշահումների» վերաբերյալ ԱԺ պատգամավորի վերաբերմունքը՝ «ՀԱԿ-ը փորձում է օգտագործել ԲՀԿ-ին, իսկ դա անիրականանալի է»։ «168 ժամը» անդրադարձել է «Հայաստանի ժողովրդագրական և առողջության հարցերի հետազոտություն 2010» զեկույցի այն մանրամասներին, որոնք ըստ թերթի հրապարակման «դուրս են մնացել լրատվամիջոցների և, որ ավելի կարևոր է, իշխանությունների ուշադրությունից» («Մեր պատկերով ու նմանությամբ»)։ «Օրակարգի» փոխանցմամբ ԱՄՀ-ի «Երկարաձգվող ֆինանսավորում» և «Երկարաձգվող վարկավորում» ծրագրերի Հայաստանի չորրորդ ամփոփիչ ստուգման զեկույցի համաձայն «ընթացիկ տարում տնտեսական աճը կկազմի 3,8 տոկոս, միջնաժամկետ կտրվածքում տնտեսական աճը կանխատեսվում է 4%-ի շրջանակում», իր հերթին ԱՄՀ-ն «իշխանություններին առաջարկել է կատարելագործել հարկային վարչարարությունը»։ Մի այլ հրապարակման մեջ թերթը ուշագրավ է համարել Հարավային Կորեայի Յոսու քաղաքում անցկացվող «Կենդանի օվկիանոսը և մերձակա տարածքները. միջոցների բազմազանությունն ու նրանց ռացիոնալ օգտագործումը» խորագրով ցուցահանդեսին Հայաստանի մասնակցությունն այն առումով, որ երկիրը «չունի ելք դեպի օվկիանոս», ինչը «չի վրիպել» նաև «Հայկական ժամանակի» «հայացքից» ու առիթ տվել գրելու՝ «Բա մի հատ էլ չսկե՞նք»։
Անդրադառնալով օրեր առաջ ԱԺ-ում վարչապետ Տիգրան Սարգսյանի՝ «քաղաքացիական հասարակության ձևավորման» մասին հայտարարությանը, «Երկիրը» գրել է, թե իբր «նոր խորհրդարանի բացարձակ անհամարժեքությունը քաղաքական իրավիճակին» հիմք չեն տալիս «խորհրդարանը համարել հասարակության հայելին»։ Մի այլ հրապարակման մեջ թերթը արձագանքել է սիրիահայության առջև ծառացած հիմնախնդիրներին և նրանց հնարավոր օգնության տրամադրման հարցերին։
«Ժողովուրդը» ըստ «ճաշակի յուրո» փորձել է «վերծանել» ՀՀ նախագահ Սերժ Սարգսյանի այցը Բրյուսել՝ «Եվրոպացիներից փող են ուզում»։ «Առավոտը» անդրադարձել է «ՏԷՑ-ի կռուգում ցույց անող» տաքսիստների բողոքին, որոնք «դեղին համարանիշներ չեն ուզում» և «սպառնում են» քշել «ուղիղ Թուրքիա»։