երեքշաբթի, 10 հուլիսի 2012
Գազը, վարկը և սերմացուն
«Օրակարգը» ԵԽ նախագահ Հերման վան Ռոմպոյի հետ համատեղ ճեպազրույցում «ֆինանսատնտեսական լարվածության» թուլացմանն ու «դժվարությունները հաղթահարելուն ուղղված աջակցության» հասանելիք մասի տրամադրման վերաբերյալ ՀՀ նախագահի հայտարարությունը որակել է «ուշագրավ» և փորձել այն վերծանել («Հոկտեմբերյան հեղափոխություն»)։ Թերթը «օրակարգային» է համարել նաև հիմնախնդիրը, թե ինչու «թանկացող միջոցները կրճատել են բանկերի շահույթները» (ըստ ԿԲ վիճակագրական տվյալների), թե «ինչու է կառավարությունը լռում ռուսական գազի թանկացման մասին» («Գազ տալ մինչև փետրվար») և «կառավարությունը սկսել է քննարկել Ռուսաստանից $1,5մլրդ-ի նոր վարկային միջոցներ ներգրավելու հնարավորությունը» («Հերթական «ռուլետկան»), ինչը, ի դեպ, նշել են նաև «Հայկական ժամանակի»՝ «ՌԴ կառավարությանը մոտ աղբյուրները» («Մի քիչ փող ղրգեք»)։ «Գոլոս Արմենիի» թերթին այս անգամ հետաքրքրել են օղու արտադրության և սպառման ոլորտում կառավարության ձեռնարկած նոր քայլերը, մասնավորապես օղիների ներմուծման լիցենզավորման բարդ ընթացակարգը, որը նմանապես գործելու է տեղական արտադրողների համար։ Թերթի կարծիքով օղու շուկայի կարգավորմանն ուղղված կառավարության վերջին երեք տարիների առաջին հայացքից անվնաս որոշումները, որոնք, թվում է, թե միտված են ազգային արտադրողի պաշտպանությանը, իրականում շահավետ են ոլորտի օլիգարխների համար («Փակուղում. «հավասարեցնելով» պայմանները, կառավարությունը կործանում է փոքր բիզնեսը»)։ «Ունքը շինելու փոխարեն աչքն էլ հանեցին», եզրակացրել է «Իրավունքը», անդրադառնալով անցած տարիներին Ռուսաստանից ներկրված ցորենի էլիտար սերմացուից ստացված բերքի որակին ու ծավալներին և նշելով, թե «բերքը նկատելիորեն պակաս կլինի անցած տարվա» համեմատ այն դեպքում, երբ «այս տարի աշխարհում սպասվում է ցորենի գնի լուրջ թանկացում»։ «Հայացքը» փոխանցել է Հայաստանի ագրարագյուղացիական միավորում» ՀԿ նախագահ Հրաչ Բերբերյանի դիրքորոշումը, թե «Սևանից ջուր վերցնելու կարիք չկա» («Ի՜նչ երաշտ, ի՜նչ բան»)։
«Հայոց աշխարհը» փորձել է պարզել, թե «ինչպես կարձագանքի շուկան հացամթերքների թանկացմանը»։ Մի այլ հրապարակման մեջ թերթը ներկայացրել է տնտեսագետ Թաթուլ Մանասերյանի հետ զրույցը. «Խուճապային տրամադրությունների համար նախադրյալներ չկան»։
