Հայաստանի Հանրապետության Կառավարություն

«Հայաստանի Հանրապետությունը», ներկայացնելով Օրենսդրական կարգավորման ազգային կենտրոնի տնօրենի պաշտոնակատար Արմեն Եղիազարյանի երեկվա մամուլի ասուլիսից մանրամասներ, կարևորել է, որ կառույցն «առաջին հերթին ուսումնասիրում է կոնկրետ ոլորտի՝ բիզնեսի և քաղաքացու վրա ազդեցություն ունեցող կարգավորումներ պարունակող իրավական ակտերը» («Գլխատելով բյուրոկրատական մեքենան, «կարգավորիչ գիլյոտինը» սկսել է իր աշխատանքները»)։ Ասուլիսին անդրադարձել են նաև «Հրապարակը», որը հընթացս «հռետորաբար» հարցրել է՝ «Իսկ ինչո՞վ է զբաղվել 20 տարի շարունակ Ազգային Ժողովը», «168 ժամը» («Տնտեսության կեղծ հմայքը»), որը քննության առարկա է դարձրել նաև հարցը, որ «մեր երկրում գործում է բիզնեսի կարգավորմանը միտված մոտ 26 հազար իրավական ակտ» ու հավելել, թե՝ «հենց այդ պատճառով երկրում բիզնես միջավայր չկա», և «Ազգը» («Գիլյոտինի» կարիքը ժամանակ առ ժամանակ կլինի)։
«Ժամանակը» փորձել է պարզաբանել, թե «ինչպես է վերահսկվում կապիտալի արտահոսքը ՀՀ-ում» և մասնավորապես «ընդգծել», թե «ոչ մի պետական կառույց էլ չի վերահսկում ու հստակ տեղեկություն չունի, թե օլիգարխը որքան գումար է արտահանում հայրենիքից»։ «Հայկական ժամանակը» (նաև «168 ժամը») շարունակել է պնդել, որ «իշխանությունները ոչ պաշտոնական բանակցություններ են սկսել ՌԴ իշխանությունների հետ՝ Հայաստանին խոշոր վարկ տրամադրելու շուրջ», փաստարկելով լրատվամիջոցներին ֆինանսների նախարարության տրամադրած երեկվա պարզաբանումը բյուջեի ֆինանսավորման ուղղությունների վերաբերյալ և այն իր հանգույն «սազացնելով»։
«168 ժամի» հետ զրույցում ՀԳՀՄ նախագահ Գագիկ Մակարյանը «հատկապես ճգնաժամի պայմաններում» կառավարության ձեռնարկած բարեփոխումները որակել է դրական, սակայն նաև հավելել է, թե «այսօր այնքան քաոսային իրավիճակ է օրենսդրական դաշտում», որ «այդ քայլերը դեռևս բավարար չեն արդյունքի հասնելու համար», իրենց հերթին անբավարար են գործարար միջավայրը, խորհրդատվության արդյունավետությունը, տեսչական կառույցների ստուգումները, վարկերի հասանելիությունը և այլն։ Մի այլ հրապարակման մեջ թերթն անդրադարձել է հայրենական արտադրության հիմնախնդիրներին («Արտադրված է Հայաստանում»)։ «Ազգի» փոխանցամբ դոլարի փոխարժեքի երեկվա արժեզրկումը նախանշում է, որ «դոլարի թանկացման ժամանակահատվածն» այլևս ավարտվել է, և «դրամի արժեզրկման միտումը ամռանը հավանաբար կպահպանվի»։ «Հայոց աշխարհը» «որոնել» է, թե «ինչի հետևանք է դոլարի թանկացումը», «Ժողովուրդը» դոլարի փոխարժեքի «մեկ գիշերվա ընթացքում կտրուկ նվազումը» համարել է «ուշագրավ» և համեմատել ընդամենը մեկ ամիս առաջվա «դոլարի սրընթաց կերպով թանկացման» հետ («Դոլարի հաշվին իրենց կաշին են փրկում»)։
«Հրապարակն» անդրադարձել է ՀԱԿ-ի և ԲՀԿ-ի՝ միմյանց չհարվածելու մասին թերթի վկայությամբ՝ «ԲՀԿ ներկայացուցիչների հայտարարությանը» («ՀԱԿ-ն ու ԲՀԿ-ն կիսել են ապագա իշխանությունը») և ներկայացրել «հասած տեղեկությունները» ապագա պաշտոնատարների վերաբերյալ։
«168 ժամը» շարունակել է «պրպտումները» «Սիվիլիթաս» հիմնադրամի «գործի» կապակցությամբ և գրել, թե «ընթացքի հետ կապված որևէ հրապարակային տեղեկություն չի հաղորդվում» («Օսկանյանի գործը՝ փակուղո՞ւմ»)։ «Ժամանակը» արձագանքել է Աբովյան-Երևան բարեգործական երթուղու վարորդների բողոքի ակցիային («ԲՀԿ բարեգործական ավտոբուսները սնկի պես աճում են»), «Առավոտը» հավելել, որ «Աբովյանի և Չարենցավանի մոտ 80 ընտանիքներ արդեն ամիսներ է՝ վնասներ են կրում»։
«Ազգը» վերստին անդրադարձել է «Սևանից առավել քանակությամբ ջուր բաց թողնելու» խնդրին («Թաց երաշտ» և սակավաջրություն»)։