Հայաստանի Հանրապետության Կառավարություն

Կառավարության երեկվա նիստին «Հայացքն» անդրադարձել է «Հանրապետության մեջ քաղաքներում ընտանեկան բժշկությունը դեռ կայացած չէ» և «Զինծառայողներին տրվող դրամական օգնության չափերը կվերականգնվեն» հրապարակումներում, «Ազգը» կարևորել է նիստի վերջում ՀՀ վարչապետ Տիգրան Սարգսյանի հանձնարարությամբ ՀՀ փոխոստիկանապետ Արթուր Օսիկյանի տրամադրած տեղեկատվությունը անձնագրերի մատակարարման խնդրի կարգավորման վերաբերյալ («Փոխոստիկանապետը հավաստիացնում է, որ անձնագրերի խնդիրը լուծված է»), «Հայկական ժամանակը»՝ ըստ «ճաշակի յուրո» տեղեկացրել, որ նիստի «գաղտնի մասում» քննարկվել է սիրիահայերի խնդիրը, միաժամանակ փորձելով «պարզաբանել» վարչապետի՝ մի շարք գերատեսչությունների ղեկավարներին տրված հանձնարարականները («Կառավարությունը հենց նոր իմացավ»)։
Կառավարության շենքի մոտ բողոքի ակցիա իրականացնող բանակում խաղաղ պայմաններում զոհված զինվորների մայրերի դժգոհությանը և վարչապետի հետ հանդիպման ակնկալությամբ նրանց կառավարության շենք մուտք գործելուն անդրադարձել են «Ժողովուրդը» («Համբերության բաժակը լցվեց»), «Հրապարակը» («Հարգելի վարչապետ, այդ սգավոր մայրերը մի օլիգարխի չափ չկա՞ն»), «Ազգը» («Զոհված զինվորների մայրերը պանհանջում էին հանդիպում վարչապետի հետ») և «Առավոտը» («Մյուս հինգշաբթի ավելի բեթար ձևով մտնելու ենք ներս»)։
«Կհաջողվի՞ ստեղծել ազատ առևտրի գոտի», հարցրել է «Հայոց աշխարհը»՝ վերստին անդրադառնալով Իրան-Հայաստան համապատասխան համաձայնագրին։ «Իրավունք դե ֆակտոն» ներկայացրել է Հայաստանում «ազատ մրցակցության հաստատման» նպատակով դեռևս 2008թ.-ից ձեռնարկված միջոցառումները, վարչապետ Տիգրան Սարգսյանի և նրա «տնտեսական թիմի» գործունեությունը՝ միտված «տնտեսական դաշտում… խաղի կանոնների սահմանմանը», որոնք «դեռևս արդյունք չեն տալիս», քանզի հիմնական տնտեսավարող սուբյեկտները «փորձում են պահպանել… հաստատված խաղի օլիգարխիկ կանոնները» («Ազատ մրցակցության հաստատման փորձերը»)։
«Օրակարգը» գրել է, որ ՎԶԵԲ-ը վերանայել է Հայաստանի տնտեսական աճի կանխատեսումը «4-4,5%-ի մակարդակում» և «եզրակացրել»՝ «Ռուսաստանը հույս է ներշնչել»։ Մի այլ հրապարակման մեջ թերթը հայտարարել է, թե «մինչ կհասցներ թանկանալ ալյուրը», պայմանավորված «համաշխարհային շուկայում ցորենի գների վերջին» բարձրացումով, «հացն արդեն թանկացել է» («Հացը ալյուր չի ճանաչում»)։ «Առավոտի» փոխանցմամբ «Արարատբանկը» նոր վարկային միջոցներ է ներգրավել ՎԶԵԲ-ից և «վարկավորելու է գյուղատնտեսության ոլորտը հայկական դրամով»։ «Իրավունքը», որ «հայաստանյան տնտեսության հիմնական չարիքներից մեկը» համարում է «օլիգարխիկ համակարգը», վերստին անդրադարձել է ՏՄՊՊ հանձնաժողովի գործունեությանը «դեղերի մասով» («Դեղերի գործը՝ յոթ փակի տակ»)։ «Հայկական ժամանակը» արձագանքել է այս տարվա առաջին կիսամյակում գազի սպառման ծավալների վերաբերյալ «Հայռուսգազարդի» հրապարակմանը՝ «Ինչո՞վ հատուցեմ վնասդ», «Հայոց աշխարհը»՝ ներկայացրել Խոսրովի արգելոցի պահպանության առումով բնապահպանների մտահոգությունը՝ «Արգելոցում ի՞նչ շինարարություն, ի՞նչ էկոտուրիզմ»։