չորեքշաբթի, 25 հուլիսի 2012
Տնտեսական աճի «հուշարարը»
«Ազգը» ըստ ԱՎԾ վերջերս հրապարակած 2012թ. հունվար-հունիս ամիսների սոցիալ-տնտեսական ցուցանիշների պարզաբանել է, թե «ինչ են հուշում» տարվա առաջին կիսամյակի «սոցիալ-տնտեսական զարգացումները» և «տնտեսական աճի ինչ ցուցանիշ կունենանք տարեվերջին»: «Հայոց աշխարհը» հավելել է, որ «տնտեսական ակտիվությունն այս տարի Հայաստանում բավականաչափ բարձր է», միաժամանակ, մի այլ հրապարակման մեջ, կանխատեսելով, որ «ներքին տնտեսությունից թելադրված զարգացումները որոշակիորեն կխթանեն գնաճը» («Սպասվում է գնաճի ակտիվացում»): «Ժողովուրդը» անդրադարձել է ՀՀ վարչապետին կից արդյունաբերական խորհրդի երեկվա նիստին, նշել, որ քննարկվել են արտահանման վրա հիմնված արդյունաբերական քաղաքականության իրականացման ուղղությամբ աշխատանքների ընթացքը, որը ներառում է կառուցվածքային, կազմակերպչական ներդրումային և ֆինանսական աջակցության ծրագրեր, սակայն վերջում «եզրակացրել է», թե միջազգային շուկաներում հնարավորությունները «կոնյակագործությունից այն կողմ առայժմ չեն անցնում»: «Հայաստանի Հանրապետության» հրապարակումներից մեկը ներկայացրել է Վանաձորի` տարիներ շարունակ չբարեկարգված և «մոռացված փողոցների» վերակառուցման կառավարության նախաձեռնությունը («Կառավարության երրորդ հրատապ ծրագրով»), մյուսը` անդրադարձել քաղաքի առևտրի խոշոր կետերում ՏՄՊՊ հանձնաժողովի դիտարկմանը («Մրցակցային խնդիրները մարզերում ևս շատ են»), որին իր «հավակնոտ» արձագանքը «Ժողովուրդը» խորագրել է` «Ճանճերն» անցել էին դեսերտի»: ՌԴ պետդումայի նախագահ Սերգեյ Նարիշկինի Երևան այցի մանրամասները, արտաքին տնտեսական հիմնախնդիրներն ու տարածաշրջանային կնճռոտ հիմնահարցերը «Իրավունքը» փորձել է դիտարկել «փոխկապակցված միջավայրում» և հարցրել` «Հայաստանը վերադառնո՞ւմ է ԽՍՀՄ»: «Ժողովուրդը» վկայակոչելով ՌԴ պետդումայի նախագահի մի արտահայտությունը («Հայաստանի ղեկավարությունն ուշադրությամբ հետևում է, թե ինչպես է զարգանում եվրասիական նախագիծը…») նկատել է, թե իբր Ս. Նարիշկինը հայտարարությունը կատարել է «ՀՀ իշխանությունների անունից» («Ռուսական արջի թաթը»):
