չորեքշաբթի, 1 օգոստոսի 2012
Թեկնածուների «խնդրի» պարագան
«Հրապարակը» ներկայացրել է մանրամասներ դեպի Սիրիա չվերթների ավելացման խնդրի վերաբերյալ` «Արմավիան» կառավարությունից ամեն ուղևորի համար 100 հազար դրամ է ուզել»: «Ժողովուրդը» իր հրապարակումներից մեկում «ըստ ճաշակի յուրո» անդրադարձել է «Լույս» հիմնադրամի ուսանողների հետ ՀՀ վարչապետ Տիգրան Սարգսյանի երեկվա հանդիպմանը («Քաշվանք»), մյուսում, նշելով ՀՌԱԿ նախկին ատենապետ Հարություն Առաքելյանի` Ստրասբուրգում գտնվելու և այնտեղ մշտական բնակություն հաստատելու մտադրության մասին, հավելել, թե իբր` քանի որ ՀՀ վարչապետ Տիգրան Սարգսյանն առժամանակ առաջ «ՀՌԱԿ ատենապետ դառնալու ցանկություն է հայտնել», ուստի «Վարչապետի վաղեմի երազանքը կատարվել է»: «Հայոց աշխարհը» լրագրողների հետ Կառավարության ազգային փոքրամասնությունների և կրոնի հարցերի վարչության պետ Վարդան Ասցատրյանի և Արդարադատության նախարարության բաժնի պետ Էդիկ Մարգարյանի երեկվա հանդիպման մանրամասները ներկայացրել է «Կկարողանա՞ն վերահսկել աղանդների գործունեությունը» հրապարակման մեջ: «Ո՞ւմ է պետք ամերիկյան դիզայնով կասկադը», հարցրել է «Իրավունք հետաքննությունը»` անդրադառնալով մայրաքաղաքի կենտրոնական հատվածներից մեկում «Գաֆեսճյան» հիմնադրամի կողմից իրականացվող աշխատանքներին, որոնց վերջն ըստ թերթի «այդպես էլ չի երևում»: Ըստ «Հայոց աշխարհի» դրամի վերջին թուլացումը «որքան էլ մեծացրել է ներմուծվող… ապրանքների գնաճային ճնշումը», այնուամենայնիվ «գնաճի նախատեսված ցուցանիշի ապահովումը առայժմ վտանգված չէ» («Գյուղմթերքները զսպում են գնաճը»): Մի այլ հրապարակման մեջ, «Առավոտի» հետ «միասին» («Ծառուկյանը Յանուկովիչից ինչո՞վ է պակաս, որ չառաջադրվի»), թերթը ներկայացրել է Ահարոն Ադիբեկյանի տեսակետներն ու նկատառումները` «Նախագահի թեկնածուների պարագայում հարցականները շատ են»:
