շաբաթ, 4 օգոստոսի 2012
Ընտրության ճանապարհը
«Առավոտի» հետ զրույցում Էկոնոմիկայի նախարար Տիգրան Դավթյանը ներկայացրել է արտահանմանն ուղղված արդյունաբերության զարգացման նպատակով ձեռնարկվող պետական միջոցառումները, նաև վստահեցրել, որ «նորաբաց ու վերազինված 60 ձեռնարկությունների ցանկ կա», «ընդհանուր առմամբ ստեղծվել է 5000 աշխատատեղ»: «Ժամանակին» ԱԱԾ նախկին ղեկավար Դավիթ Շահնազարյանը փոխանցել է իր դիտարկումները եվրասիական տնտեսական համագործակցության անդամակցության վերաբերյալ` «Եվրոպա՞, թե՞ «Եվրասիա». ընտրություն ապագայի և անցյալի միջև»: Նույն թեմային իր մեկ այլ անդրադարձը թերթը խորագրել է «Այն, ինչ առաջարկում է Ռուսաստանը` վտանգում է Հայաստանի ինքնիշխանությանը»: «Հրապարակը» փորձել է «հնարավորինս մանրամասնել» ԱՊՀ ազատ առևտրի մասին համաձայնագիրը և նշել, թե փաստաթղթի «նախկին օրինակը, ավելի ճիշտ` դրա հավելվածները, լուրջ փոփոխություն են կրել», մասնավորապես «նախկինի պես տուրք է վճարվելու նաև գյուղմթերքների համար» («Տնտեսական շաբաթ, կամ հիմա մենք անկա՞խ ենք»):
«Առավոտը» ահազանգել է, թե Լինսի հիմնադրամի միջոցներով կառուցված Ոսկեպար-Կիրանց ճանապարհը «քանդվել կամ փոս է ընկել»` «մեծ հաշվով ճանապարհաշինարարների անորակ աշխատանքի» պատճառով («Միլիոնավոր դոլարների օգուտն ու վնասը»), «Հրապարակը» անդրադառնալով գյուղատնտեսական մշակաբույսերի նոր վնասատուի` ցեցի տարածմանը, հարցրել` «Ո՞վ է պատասխան տալու լոլիկի և կարտոֆիլի ցեցի հասցրած վնասների համար»:
Լոնդոնյան օլիմպիադայում հայ մարզիկների անհաջողության պատճառների մասին աշխարհահռչակ ծանրորդ, ՀՀ նախագահի խորհրդական Յուրի Վարդանյանի պարզաբանմանը «Նովոյե Վրեմյան» անդրադարձել է «յուրովի»` «Յուրի Վարդանյանն ընդդեմ Գագիկ Ծառուկյանի»: «Ժամանակը» հավելել է, թե «Մինչ պարզաբանում են նախկին ձախողումների արդյունքները»` օլիմպիադայում Հայաստանը ներկայացնող մեկ այլ ծանրորդ Արա Խաչատրյանը «նույնպես 0 ստացավ»:
