ուրբաթ, 10 օգոստոսի 2012
Կարդա, գրիր…
Պատմական տարբեր իրավիճակների կրկնությունը ըմբռնելու և գնահատելու համար «Նոր ժամանակներ» կուսակցության առաջնորդը բոլոր ղեկավարներին խորհուրդ է տալիս «շատ գրքեր կարդալ»: Ինքն, օրինակ, հասկացել է, որ Հայաստանի ներկա իրավիճակը «կամաց-կամաց սկսում է մոտենալ» Ռուսաստանի 17 թվականի հունվարին: Նման և մի շարք այլ դատողություններ անելու առիթ է դարձել ՀՀ և ՌԴ նախագահների հանդիպումը, որից Արամ Կարապետյանը «ոչինչ չի հասկացել» («Ժողովուրդ»): Հայ-ռուսական բարձր մակարդակի բանակցությանն անդրադարձել է «Առավոտը» («Սարգսյանը նրբորեն Պուտինին ասել է` ո՞չ. Եվրոպա, թե՞ Ռուսաստան, այս է խնդիրը», «Պուտինը նաև գարեջուր է սիրում»):
«Ժողովուրդը» համամիտ չէ ՀՀ էկոնոմիկայի նախարարի այն պնդմանը, թե առաջին կիսամյակում արդյունաբերության ոլորտը աննախադեպ մեծ աճ է գրանցել: Ըստ այդ տրամաբանության, եթե նախորդ տարվա նույն ժամանակամիջոցում երկրում արտադրվել է 1(մեկ) տրակտոր, իսկ այժմ` 103, ապա տրակտորների արտադրությունն ավելացել է 103 անգա՞մ: Թերթի տարակուսանքն են հարուցել ԱՎԾ մի շարք այլ տվյալներ ևս: Զարմանալու և որևէ արտահայտված միտք հույժ ինքնատիպ մեկնաբանելու հատկանիշն այս թերթի մենաշնորհը կարելի է համարել: Այս անգամ նման վերաբերմունքի է արժանացել եզդի ժողովրդի ազգային ավանդույթները հարգելու մտադրությունը, որը արտառոց մեկնաբանությունների տեղիք է տվել:
Արտառոց փաստեր է ներկայացրել «Հրապարակը»: Թերթի տվյալներով, Հայաստանի որոշ պաշտոնյաներ Վրաստանի ծովափ հանգստանալու են մեկնում ծառայողական ավտոմեքենաներով («Պետական ունեցվածքի հակաօրինական օգտագործման մասին»):
