չորեքշաբթի, 15 օգոստոսի 2012
«Տխրությունս կամաց-կամաց փոխվում է լացի»
Նման տրամադրություն են հարուցում «Հայկական ժամանակի» որոշ հրապարակումներ: Տարվա առաջին կիսամյակում Հայաստանից մեկնած և ժամանած քաղաքացիների թվի տարբերության և վիճակագրական մի քանի այլ տվյալները տեղ են գտել «Տխուր, շատ տխուր վիճակագրություն» խորագրի ներքո, առաջին 5 ամիսներին արձանագրված տների էժանացման տեղեկանքը` «Վիճակը վիճակ չէ» վերնագրով: Մեկ այլ թղթակցության հերոսը, որը ֆերմերային կազմակերպության ղեկավար է, դժգոհում է, որ այս տարի ցորենի բերքը նվազ է և անորակ. «Դա օլիգարխների արած գործն է, նրանք, լավ սերմերը պահելով իրենց, բարձր գներով վաճառում են, գյուղացուն թողնելով զիբիլ»: Մյուս թերթերն էլ առանձնապես լավատես չեն: «Ժողովուրդը» «Արտֆուդի» մարքետինգի և գովազդի բաժնից չի կարողացել պարզել, թե «ինչպես է հայկական շուկայում իրականացվում պահածոյի իրացումը», իսկ «Հրապարակը», հակառակը, իր լավատեղյակ աղբյուրներից տեղեկացել է, որ նույն ձեռնարկությունում «շարքային աշխատողը ծեծի է ենթարկվել ղեկավարի կողմից»: Այս թերթը մեկ այլ, այս անգամ հայտնի գործարարի օրինակով ճգնում է ապացուցված համարել այն, որ իբր մեր երկրում «ամենապաշտպանված մարդիկ անգամ պաշտպանված չեն սնանկացումից և խաբեությունից», քանի որ ոմն Աշոտ Սուքիասյան «բենդերյան ոճով» խաբել է գործարարին:
Մամուլը, տվյալ դեպքում «Ժողովուրդը», շարունակում է քննադատել երկրից առանց դիվանագիտական ներկայացուցչությանը տեղեկացնելու վեց ամսից ավելի բացակայողներին տուգանելու որոշումը: «Առավոտը» մասնագետների աջակցությամբ քննարկում է ամուսնության տարիքի փոփոխման հարցը, «Ազգն» ու «Ժողովուրդը» լուսաբանում են Ծաղկաձորում Լեոնիդ Ենգիբարյանի արձանի բացման արարողությունը:
