ուրբաթ, 31 օգոստոսի 2012
«Օլիգարխների խոսափողը»
ՀԱԿ տնտեսագետ Հրանտ Բագրատյանին այսպես է անվանում «Ազգը». «… նախկին վարչապետը մեծ հաշվով գործիք է դարձել մի քանի փողատերերի ձեռքին, ովքեր երազում են սեփական օգտագործման վարչապետ ունենալու տեսլականի մասին` դրա համար էլ հնարավորինս «քլնգելով» գործող կառավարությանը»: Բագրատյանի քլունգի երբեմնի հարվածներից առաջացած բեկորների օգտագործմամբ է կառուցել իր հոդվածներից մեկը «Ժողովուրդը». իբր, ՀՀ կառավարությունն անտեղյակ է եղել, որ ՀՀ արտաքին պարտքը 6.5մլրդ դոլար է: Այս թերթը «վառ է պահում» նաև վարչապետի մոտալուտ պաշտոնանկության թեման:
«ՀԺ»-ն շարունակում է ահով լցնել ընթերցողի սիրտը` կրկին հավաստելով, որ «Եկամտահարկի մասին» օրենքի փոփոխություններից տուժելու են «անհատ ձեռներեցները», «Հայոց աշխարհը» քննադատում է իշխանության քաղաքականությունը երկրի ընդերքի օգտագործման ոլորտում. «…եթե չենք ավելացնում, գոնե չպակասեցնենք երկրի հարստությունը», «Հրապարակը» Առողջապահության գործակալության պետի պաշտոնանկությունը բացատրում է ոլորտի վերաբերյալ վարչապետի հնչեցրած խիստ քննադատությամբ` «Ստվերի մեղավորը Տեր-Գրիգորյա՞նն էր»: Կառավարության գործունեության դրական գնահատականներ են բովանդակում «Առավոտի» և «Հայոց աշխարհի» հրապարակումները:
«Առավոտը» փոխանցում է քաղաքագետներից մեկի կարծիքը, թե չի բացառվում, որ «Սիրիան կմնա առանց հայերի»: Քննադատության իր բաժինն է ստանում նաև գործող իշխանությունը. «ՀՀ կառավարությունը հայրենիք վերադարձող հայերի համար երբևէ չի մշակել ստրատեգիական ծրագրեր»:
