Հայաստանի Հանրապետության Կառավարություն

Հայոց լեզուն անգիտության հետևանքով բզկտող հանրային գործիչների թիվն ավելացել է ևս մեկով. ԲՀԿ նորընտիր պատգամավորն այսպես է բնորոշում ԲՀԿ-ՀՀԿ «գործակցությունը». «Հանրապետականի հետ մեզ մոտ գաղափարական պայքար է, և առաջին հերթին դա կառավարության ծրագրից է, որովհետև մեր կուսակցությունը չի ընդունում կառավարության ծրագիրը» («Առավոտ»): Բարեբախտաբար, այս կուսակցության դիրքորոշումն ավելի հոդաբաշխ ներկայացնող գործիչներ էլ կան: Օրինակ` «Երբ որ ԲՀԿ-ն հարմար գտնի խոսել նախագահական ընտրությունների մասին, այդ ժամանակ էլ կխոսի» («Ժողովուրդ»), «Ցանկալի չէ մեզ հրամցնել կանոնակարգով կամ այլ կերպ առաջարկվող, առավել ևս պարտադրվող որևէ ձևակերպում: Քաղաքագիտական գրականության մեջ ես երբեք նման պարտադրանքի չեմ հանդիպել» («Հայոց աշխարհ»): Մինչդեռ «Ժամանակի» տեղեկություններով ամեն ինչ ավելի պարզ է. ԲՀԿ ղեկավարը և «մի խումբ խոշոր գործարարներ» պարզապես սկսել են «կրճատել իրենց բիզնես-գործունեության ծավալները, որ խոչընդոտեն տարեվերջին տնտեսական աճի արձանագրմանը»: Սակայն դա, ըստ ՀՀԿ ներկայացուցիչների, դժվար թե արդյունք տա, քանի որ, Էդ. Շարմազանովի խոսքով, «ՀՀԿ-ն վստահում է վարչապետի և մեր կողմից ձևավորված կառավարության քայլերին» («Առավոտ»): Սամվել Նիկոյանը նույնպես վստահ է, որ «վարչապետը մնալու է, ղեկավարելու է կառավարությունը, և առջևում բարեփոխումների ուղղությամբ սպասվում են շատ ավելի գործնական քայլեր»: «Ազգը» «մրցակցային դաշտում Հայաստանի առաջընթացը ներկայիս կառավարության արժանիքն է» համարում («Կրկին Հայաստանի մրցունակության մասին»), «Ռեսպուբլիկա Արմենիան» շեշտում է, որ Հայաստանը արդյունաբերական ապրանքների արտադրությամբ առաջատար դիրք ունի ԱՊՀ-ում:
Քննադատությունը ևս անպակաս է մամուլում: Վերահսկիչ պալատի նախագահի երեկվա զեկուցմանն արձագանքել են «Հրապարակը», «Հայոց աշխարհը», «Իրավունք-հետաքննությունը», «Ազգը», «Օրակարգը», «Ժողովուրդը»: Կառավարության գործունեության մեջ այլ թերություններ են մատնանշում «ՀԺ»-ն («Հարստացող սովածները»), «Հայոց աշխարհը» («Աղքատությունը խորացել է, խնայողությունները` ավելացել»), «Օրակարգը» («Վարկերը հրաժարվում են աշխատել», «Պարտքը սպասարկվելու հատկություն ունի»), «Հրապարակը» («Այսպես որ գնա, իշխանությունը կվերածվի ՀՀԿ-ական կուսակցական կլուբի»): Վերջին «վրձնահարվածը» կատարում է «ՀԺ»-ն` զարմանալով, որ «կառավարության հեռախոսային «խփած պլատան» փոխելու համար ավելի քան մեկ ամիս է անհրաժեշտ»: