ուրբաթ, 14 սեպտեմբերի 2012
ԱԺ և կառավարության նիստերն ու մամուլը
Ամենաքննարկվողն, անկասկած, կենսաթոշակային բարեփոխման հարցն է, որն արժանանում է ծայրահեղ գնահատականների. «Հետևողականորեն կործանում են երկիրը» («ՀԺ»), «Ընդդիմադիրների վրդովմունքն ու Արգամիչի ոտնահարված համեստությունը» («Հրապարակ»), «Մեզանից հետո թեկուզ ջրհեղեղ» («Ժողովուրդ»), «Ֆինանսների փոխնախարարը մշակույթի պակաս է նկատում. Վարդան Արամյանը` կենսաթոշակային բարեփոխման ընթացքի մասին» («Օրակարգ»): Եվ քանի որ Հ1-ը «մոնտաժել էր» առաջին դասարանցիներին համակարգիչ տրամադրելուն վերաբերող հարցը, «ՀԺ»-ն այն տպագրել է վարչապետի պատասխանով հանդերձ: Այս թերթի լրահոսում տեղ է գտել էլեկտրոնային ստորագրությանը վերաբերող որոշումը, որին ավելի հանգամանորեն անդրադարձել է «Ազգը»: «Հայացքը» արծարծել է նիստում քննարկված ևս երկու հարց` «Կառավարությունը վճարել է Եվրադատարանում Հայաստանին հաղթածների գումարները» և «Հայաստանում կներդրվի կոլեկտիվ հայցերի ինստիտուտ»: «ՀԺ» -ին խիստ հետաքրքրել է Վ. Համբարձումյանի անվան մրցանակի առաջիկա հանձնման վերաբերյալ կառավարության որոշումը, որը, պարզվում է, ակադեմիկոս Դ. Սեդրակյանի սրտով չէ. «Փաստորեն, Վ. Համբարձումյանի անունն օգտագործվում է նրա գիտական հակառակորդների աշխատանքները գովազդելու համար»: Ֆիննախը պատասխանել է «Օրակարգի» նախորդ համարի քննադատական հրապարակմանը, նույն «Օրակարգը» կառավարությանը քննադատել է գազի սակագնի խնդրով լռելու» համար, իսկ «Հայաստանի զրուցակիցը» միանգամից երկու հոդված է նվիրել տնտեսության խնդիրներին` «Բիզնեսի վիճակը Հայաստանում» և «Կառավարությունը և գյուղացին»:
«Իրատես դե ֆակտոն» զրուցել է տեխնիկական գիտությունների դոկտոր Վ. Համազասպյանի հետ` «Եթե ՀՀ վարչապետը կոնկրետ քայլեր է անում, ուրեմն լուրջ հեռանկար է տեսնում»: Այս թերթը մեկնաբանել է նաև ԱԺ-կառավարություն հարցուպատասխանի ժամանակ հնչած Եվրասիական միությանն անդամակցելու հարցը` «Վարչապետի պատասխանը Չեմբեռլենին»:
