Հայաստանի Հանրապետության Կառավարություն

Մամուլի հրապարակումներից կարելի է այն տպավորությունն ստանալ, թե մի գիշերում հայրենի վերլուծաբանների թիվը կրկնապատկվել է: Դրան նպաստել են Վ. Օսկանյանին անձեռնմխելիությունից զրկելու միջնորդությունը և Վ.Խաչիկյանի ձերբակալությունը. վերլուծաբանները հմտորեն միահյուսում են այս երկու իրողությունները, ինչը երևում է նույնիսկ նյութերի վերնագրերից` «Օսկանյանը հոգեբանորեն պատրաստ է ձերբակալության», «ՀՀ գլխավոր դատախազության միջնորդությունը ԱԺ-ին» («ՀԺ»), «Ինչպե՞ս է կոփվում «ընդդիմությունը», «ԲՀԿ-ն դառնում է հանուն արդարության մարտնչող մարտիկ», «Գործարարների հետ բարդ խնդիրները Բաղրամյան 26-ում լուծում են կոմպրոմատներով» («168 Ժամ»), «Վա բանկ` ԲՀԿ-ին հնազանդեցնելու համար» («Ժողովուրդ»), «ԲՀԿ-ն դիմում է առճակատման» («Հրապարակ»), «Պատերազմի կանոնները», «Խաչիկյանը ձերբակալվեց կանխորոշված պահին», «Ո՞վ կհաջորդի Խաչիկյանին» («Ժամանակ»), «Վազգեն Խաչիկյանին ձեռնաշղթա հագցրին» («Նովոյե Վրեմյա»), «Վազգեն Խաչիկյանը ձերբակալված է, Ռուբեն Հայրապետյանը անձեռնմխելի չէ. երկիրը երկի՞ր է դառնում» («Ազգ»):
«Ժողովուրդը» մեջբերում է Գագիկ Բեգլարյանի` մեկ այլ լրատվամիջոցի հետ զրույցում ասածը. «Իմ եղբոր ղեկավարած կառույցը 2010 թվականից գնումների հետ ընդհանրապես կապ չունի», ինչպես նաև տեղեկացնում, որ առայժմ այդ ՊՈԱԿ-ից ազատված է միայն տնօրենը, իսկ մնացածները, հակառակ վարչապետի հրահանգի, շարունակում են պաշտոնավարել:
Գոմեշի մսի ներկրման նրբերանգները բացահայտելու գործում իր ավանդն է ներդնում «Նովոյե Վրեմյան», իսկ «Հայոց աշխարհը» մատնանշում է սննդամթերքի անվտանգության ոլորտի, ինչպես նաև խաղատնային բիզնեսի բնագավառի արձանագրված և չարձանագրված թերությունները:
Մամուլը պատրաստ է քննարկել նաև 2013թ. պետբյուջեի նախագիծը` «Ի՞նչ է խոստանում 2013-ի պետական բյուջեն» («Ժամանակ»), «Շա՜տ հարաբերական աճ («ՀԺ»), «Բարեփոխումների ուղղությամբ առաջընթաց կա, թեև ցանկալիից դանդաղ տեմպերով» («Ազգ»:)