երեքշաբթի, 9 հոկտեմբերի 2012
Շուտով, շուտով…
Գյուղմթերքի սեզոնը շուտով կավարտվի, և գնաճը կվերադառնա իր «ավանդական» բարձր մակարդակին («ՀԺ»): Շուտով (եկող տարվանից) Հայաստանի արտաքին պետական պարտքի սպասարկումը կտրուկ կավելանա («ՀԱ»), և կառավարությունը ստիպված կլինի այդ նպատակով ներգրավել ևս 479 մլն դոլար վարկային միջոցներ («Օրակարգ»): Մնացած տեղեկությունները ևս մխիթարական չեն. ՀՀ ՊՆ քննչական ծառայությունում «գոմեշի մսի» հայտնի պատմության քննությունը «մտել է փակուղի» («Ժողովուրդ»), գործազուրկների թիվը նվազել է ոչ թե նոր աշխատատեղերի շնորհիվ, այլ ընդամենը` արտագաղթի, Հայաստանի համայնքներում հողի հարկի գծով արձանագրվել է ավելի քան 35 տոկոս թերակատարում («ՀԺ»), բուժհիմնարկների ղեկավարները հայտարարում են, թե տեղյակ չեն ՏՄՊՊՀ բացահայտումներից («Ժամանակ»):
Հումորը և հեգնանքը մնայուն տեղ ունեն տպագիր մամուլի էջերում: «Դե ֆակտո իրատեսը» բազմապիսի հնարքներով պարզաբանում է ԲՀԿ-ի` խորհրդարանի աշխատանքը բոյկոտելու իրական պատճառը, «Ժողովուրդը»` լուծում մեր երկրի տրակտորաշինության աննախադեպ զարգացման «հանելուկը», «ՀԺ»-ն` բացահայտում կազինոների միջոցով կաշառք տալու և վերցնելու «հուսալի և անվտանգ մեխանիզմը»:
«Ազգը» և «Հրապարակը» լուսաբանում են վարչապետի այցելությունը Գյումրու տեխնոպարկ, «Իրավունքը» շարունակում է «Եկամտային հարկի մասին» ՀՀ օրենքի հանրային քննարկումը, «168 ժամը» կանխատեսում է, որ իբր Եվրասիական միությանն անդամակցելու դեպքում ՀՀԿ-ն կարող է հեռացվել Եվրոպայի ժողովրդական կուսակցությունից: Եվ այլն:
