ուրբաթ, 12 հոկտեմբերի 2012
«Արի, գութան, վարի, գութան…»
Ինչպես միշտ, ինքնատիպ մտքերի հեղեղ է ժայթքում երկրի գլխավոր մարքսիստը: Նա առաջարկում է ՀԱԿ առաջնորդին հանձնել խորհրդարանի ղեկավարումը, իսկ ԲՀԿ առաջնորդին, որպես «տեխնոկրատի», «բռնել տալ կառավարության գութանի մաճը, որպեսզի այդ գութանը դառնա վարող տրակտոր» («Առավոտ»): Հազիվ էր թերթերից մեկը` «ՀԺ»-ն, լուր տվել, թե իբր հախագահ Պուտինը նոր «վարչապետացու» է բերելու Հայաստան, երբ մյուսը` «Ժամանակը», զարգացնում է այդ միտքը, ավելին, կետ առ կետ ապացուցում, որ մեր հասարակության հիշողությունն այնքան կարճ չէ, որ համաձայնի Կարեն Կարապետյանի նշանակմանը: Սակայն գլխավոր նորությունն այն է, որ ՀՀԿ-ն երեկ որոշել է մինչև տարեվերջ հայտարարել Սերժ Սարգսյանին ՀՀ նախագահ առաջադրելու մտադրությունը` «Ժողովուրդ», «ՀԺ» (ի դեպ, հաղորդվում է, որ նիստին չէր մասնակցում վարչապետը): Այս թերթերը, ինչպես նաև «Ժամանակը», «Դե Ֆակտո իրատեսը», «ՌԱ»-ն, «Հրապարակը», «Օրակարգը», «Իրավունքը», «ՀԱ»-ն, «ՀԺ»-ն, «Առավոտը» մանրամասնորեն նկարագրում են առողջապահության նախարարությունում վարչապետի հրավիրած խորհրդակցությունը: «Ժամանակը» տեղեկացնում է, որ վարչապետի մասնակցությամբ հաջորդ «աղաղակող բացահայտումներով» հանդիպումը տեղի է ունենալու քաղաքաշինության նախարարությունում: «Ժողովուրդը» փոխանցում է բնապահպանության նախարարությունից ինքնակամ հեռացած Արծրուն Պեպանյանի կարծիքը. «Ես շատ վաղուց էի փորձում դուրս գալ աշխատանքից: Անընդհատ հետաձգում էի` կարծելով, որ կադրային փոփոխություն կլինի: Նախարարը կործանել է նախարարությունը»:
«Կոռուպցիոն գործերի» բացահայտման և դրանց դրդապատճառների սեփական մեկնությամբ հանդես գալով, («Վարչահրամայական սթափարան»), «Հայաստանի զրուցակիցը» այդուհանդերձ, հայտնել է տեսակետ, թե իբր «Կոռուպցիան բացահայտվում է ու… շարունակում է փթթել», ինչպես «հաշմանդամների խնդիրները»: «Իրավունքը» փորձել է «վերծանել» «Համատարած թալանի անցյալն ու ներկան»… ի մասնավորի «տարօրինակ» համարելով մայրաքաղաքի «ասֆալտբետոնե ծածկի հիմնանորոգմանն օժանդակելու նպատակով» գումարի տրամադրման կառավարության որոշումը:
«Ծրագրերից մնաց միայն պատճենը», եզրակացրել է «Օրակարգը» գրելով, թե «կառավարությունը, էներգետիկ և ենթակառուցվածքային ծրագրերը… պետբյուջեի մեկ ուղերձից տեղափոխում է մյուսը» և նշելով, թե «Խոշորամասշտաբ նախագծերը կրկին տեղափոխվել են հաջորդ տարի»: Ըստ «Ժամանակի» տեղեկութան «գազալցակայանների գործունեության հիմնական ծավալը ստվերում է մնում», և բիզնեսի այդ ոլորտից «շատ չնչին հարկային վճարումներ են կատարվում» («Ծառուկյանի գազն էլ է «ստվերում»):
«Առավոտը» և «Ժողովուրդը» պարզել են, որ ՀՀ վճռաբեկ դատարանի նախկին նախագահ Հովհաննես Մանուկյանը տեղյակ է Եվրադատարանի որոշումներից, որոնց համաձայն կառավարությունը պետք է «մի քանի հարյուր հազար եվրո փոխհատուցի ՀՀ քաղաքացիներին»:
