Վարչապետ Տիգրան Սարգսյանն այսօր մասնակցել է Երևանի Կարեն Դեմիրճյանի անվան մարզահամերգային համալիրում անցկացվող հայ ֆերմերների առաջին համաշխարհային «Հայագրոֆորում» երկօրյա համաժողովի բացմանը:
Ողջունելով համաժողովի մասնակիցներին՝ վարչապետը նշել է, որ դրա անցկացումը կառավարությունը դիտում է որպես ագրարային ոլորտում միջազգային համագործակցության զարգացմանն ուղղված կարևորագույն քայլ:
Անդրադառնալով ագրարային ոլորտին՝ Տիգրան Սարգսյանը նշել է, որ այստեղ առկա են նկատելի հիմնահարցեր և նույնքան նկատելի ձեռքբերումներ. «Անցած 20 տարիների ընթացքում մենք անցել ենք դժվարին ճանապարհ և ունենք բազմաթիվ հիմնախնդիրներ: Մենք պետք է միասնաբար բացահայտենք գյուղատնտեսության ոլորտում առկա ներուժը՝ այն մեր ժողովրդի կարիքների բավարարմանը ծառայեցնելու համար: Այս տեսակետից, Հանրապետության նախագահի նախընտրական ծրագրում առկա էր կարևորագույն սկզբունք՝ ապահովել Հայաստանի տարածքային համաչափ զարգացումը: Հասկանալի է, որ այս նպատակին հնարավոր չի լինի հասնել, եթե մենք չարդիականացնենք մեր երկրի գյուղատնտեսությունը: Ժամանակակից աշխարհը տեղեկատվական տեխնոլոգիաների և գիտության զարգացմամբ՝ գյուղատնտեսության զարգացման համար ստեղծում է նոր և բացառիկ հնարավորություններ»:
Նշելով, որ մեր երկրում այսօր առկա է շուրջ 340 հազար գյուղացիական տնտեսություն և 430 հազար հեկտար մշակովի հող, վարչապետն ասել է, որ մեկ տնտեսությանը բաժին ընկնող հողատարածքների ծավալը բավականին փոքր է: «Մեր ծրագրերը մշակելիս մենք պետք է մտածենք, թե այս իրողության պայմաններում ինչպես պետք է կազմակերպենք արդյունավետ զարգացում գյուղատնտեսության համար: Այդ տեսակետից, կարևորում եմ կառավարության հաստատած գյուղատնտեսության զարգացման հայեցակարգը, որը քննարկվել է Հանրային խորհրդի, գյուղացիական տարբեր մասնագիտական միավորումների և գիտահետազոտական ինստիտուների հետ: Փորձել ենք այդ փաստաթղթում ներառել ժամանակակից գյուղատնտեսության կազմակերպման բոլոր սկզբունքները: Այն ներառում է ոչ միայն գյուղատնտեսության, այլև գյուղի զարգացումը»:
Տիգրան Սարգսյանը նշել է, որ ժամանակակից աշխարհը թելադրում է, որպեսզի գյուղատնտեսության զարգացումը դիտարկվի գյուղի հիմնախնդիրներին զուգահեռ: «Այսինքն, մեր խնդիրն է գյուղացու կյանքը դարձնել հարմարավետ: Կառավարության առջև ծառացած խնդիրներից մեկն էլ գյուղը ժամանակակից ենթակառուցվածքներով ապահովելն է՝ ճանապարհների, խմելու և ոռոգման ջրի համակարգերի կառուցումը և այլն: Հասկանալի է, որ այս ենթակառուցվածքների ձևավորումը գյուղացու համար բացահայտելու է նոր հնարավորություններ և հեռանկարներ»:
Կարևորելով միջազգային կազմակերպությունների հետ իրականացվող գյուղատնտեսական ծրագրերի կազմակերպումը՝ կառավարության ղեկավարն ասել է, որ շնորհիվ այդ ծրագրերի՝ գյուղացիներն ստանում են նոր գիտելիքներ, գյուղտեխնիկա և այլն: Վարչապետն ընդգծել է, որ 2012 թվականը նույնպես հռչակվելու է գյուղատնտեսության զարգացման տարի: Հանրապետության 55 համայնքներում Համաշխարհային բանկի օժանդակությամբ ներդրվելու են կառավարման նոր մեխանիզմներ և ձևավորվելու են կոոպերատիվներ: «Խթանվելու է կոոպերացիան, ինչը կբարձրացնի գյուղատնտեսության արդյունավետությունը տարեկան առնվազն 30 տոկոսով»,- նշել է Տիգրան Սարգսյանը՝ ավելացնելով, որ պետությունը գյուղտեխնիկայի ձեռքբերումը համաֆինանսավորելու է 50 տոկոսով: Նրա տեղեկացմամբ՝ նմանատիպ միջոցառումներ իրականացվելու են նաև գյուղատնտեսության բոլոր բնագավառներում՝ սկսած սերմնաբուծությունից, ավարտած այգիների կառավարմամբ:
Վարչապետը հույս է հայտնել, որ «Ագրոֆորումի» անցկացումը ևս կնպաստի մեր երկրում գյուղատնտեսության զարգացմանը:
Համաժողովի շրջանակում կքննարկվեն Հայաստանում գյուղատնտեսության ոլորտում տեղի ունեցող զարգացումները, առկա խնդիրներն ու իրականացվող ծրագրերը: Համաժողովը հնարավորություն է ընձեռում հայաստանյան և սփյուռքահայ, ինչպես նաև տարբեր երկրներից ժամանած օտարերկրյա գործարարներին ներկայացնելու իրենց արտադրատեսակներն ու մատուցվող ծառայությունները, հաստատելու փոխշահավետ համագործակցություն, ծանոթանալու գյուղատնտեսության ոլորտում Հայաստանում առկա ներդրումային հնարավորություններին և գյուղատնտեսության զարգացման միջազգային առաջադեմ փորձին: Համաժողովի նպատակն է ագրոպարենային բնագավառի գործարարների և ֆերմերների համահայկական ընկերակցության ստեղծումը:
Հայաստանում առաջին անգամ ՀՀ կառավարության որոշմամբ` յուրաքանչյուր տարի հոկտեմբեր ամսվա երրորդ կիրակի օրը նշվելու է որպես «Հայաստանի Հանրապետության գյուղատնտեսության աշխատողի օր», որն այս տարի համընկնում է համաժողովի անցկացման հետ։ Այս կապակցությամբ մայրաքաղաքում և Հայաստանի մարզերում անցկացվելու են տարբեր միջոցառումներ՝ տոնավաճառներ, ցուցահանդեսներ և այլն: