ՀՀ վարչապետ Անդրանիկ Մարգարյանն այսօր ընդունել է Հայերի համաշխարհային կոնգրեսի և Ռուսաստանի հայերի միության նախագահ Արա Աբրահամյանին և նրա գլխավորած պատվիրակությանը:

Հյուրերը վարչապետին ներկայացրել են Հայաստան իրենց հերթական այցի նպատակը, այցի ծրագրի շրջանակներում իրականացված միջոցառումները, համառոտ անդրադառնալով նաև Ռուսաստանի հայերի միության 5-ամյա գործունեության արդյունքներին, ընթացիկ աշխատանքներին և նախատեսվող ծրագրերին, որոնց հետ կապված որոշակի առաջարկություններ քննարկվել են ՀՀ կառավարության ղեկավարի հետ:

Վարչապետը բարձր է գնահատել Ռուսաստանի հայերի միության գործունեությունը՝ տեղի հայ համայնքի համախմբման, առկա ներուժը համահայկական նշանակության ծրագրերի իրագործմանը նպատակաուղղելու գործում, նշելով, որ այդ գործելաոճը կարող է օրինակ հանդիսանալ նաև այլ երկրներում սփյուռքի մեր հայրենակիցների համար:

Հանդիպման ընթացքում քննարկվել են նաև ՀՀ կառավարության՝ սոցիալ-տնտեսական խնդիրների լուծմանն ուղղված ծրագրերում Հայերի համաշխարհային կոնգրեսի և Ռուսաստանի հայերի միության ներուժը ևս լիարժեք օգտագործելու հնարավորությունները: