ՀՀ վարչապետ, Ֆրանսիայում Հայաստանի տարվա նախապատրաստական աշխատանքները համակարգող պետական հանձնաժողովի նախագահ Անդրանիկ Մարգարյանն այսօր աշխատանքային եռօրյա այցով կմեկնի Ֆրանսիայի Հանրապետություն՝ Հայաստանի անկախության 15-ամյակին և Ֆրանսիայում Հայաստանի տարվա խորհրդանշական մեկնարկին նվիրված միջոցառումներին մասնակցելու նպատակով:

ՀՀ վարչապետի գլխավորած պատվիրակության կազմում են ՀՀ ֆինանսների և էկոնոմիկայի նախարար Վարդան Խաչատրյանը, Ֆրասիայում Հայաստանի արտակարգ և լիազոր դեսպան Էդվարդ Նալբանդյանը, ՀՀ ԱԺ պատգամավորներ, Լոռու և Գեղարքունիքի մարզպետները, Երևանի քաղաքապետի առաջին տեղակալ Կամո Արեյանը, ՀՀ մշակույթի և երիտասարդության հարցերի նախարարի տեղակալ Արթուր Պողոսյանը, «Համահայկական երիտասարդական միջազգային կենտրոն» հիմնադրամի գործադիր տնօրեն Արմեն Սինանյանը, ՀՀ կառավարության և ՀՀ արտաքին գործերի նախարարության աշխատակազմերի պատասխանատու պաշտոնյաներ: ՀՀ վարչապետի հետ, պաշտոնական պատվիրակության կազմում Փարիզ կմեկնեն նաև տեղական ինքակառավարման մարմինների ղեկավարներ:

Աշխատանքային այցի շրջանակներում ՀՀ վարչապետ Անդրանիկ Մարգարյանը և ՀՀ պաշտոնական պատվիրակության անդամները հոկտեմբերի 17-ին կմասնակցեն Ֆրանսիայի Սենատում կայանալիք Հայաստանի և Ֆրանսիայի քույր քաղաքների ապակենտրոնացված համագործակցության կոնֆերանսին, Ֆրանսիայի Սենատի նախագահ Քրիստիան Պոնսլեի, ինչպես նաև Ֆրանսիայի Ազգային ժողովի նախագահ Ժան-Լուի Դեբրեի անունից ՀՀ վարչապետի պատվին կազմակերպվելիք ընդունելություններին: Այցի հաջորդ օրը՝ հոկտեմբերի 18-ին, նախատեսվում է ՀՀ վարչապետ Անդրանիկ Մարգարյանի ելույթը Փարիզի Գարնիե Օպերային թատրոնում տեղի ունենալիք Հայաստանի ազգային տոնին և Ֆրանսիայում Հայաստանի տարվա խորհրդանշական մեկնարկին նվիրված հանդիսությանը: