Վարչապետ Տիգրան Սարգսյանն մասնակցեց Հայաստանի Հանրապետությունում ԱՄՆ դեսպանատանը կազմակերպված «Ազատության պաշտպանի մրցանակ. Հայաստան 2010» մրցանակաբաշխության հանդիսավոր արարողությանը: Միջոցառումն անցկացվում է Մարդու իրավունքների պաշտպանության միջազգային օրվա առթիվ: Մրցանակը ԱՄՆ Կառավարության կողմից հանձնվում է արդեն երրորդ տարին անընդմեջ և նպատակ ունի արժևորելու այն դրական զարգացումները, որոնք տեղի են ունեցել ընթացիկ տարում:
Ողջունելով ներկաներին և մրցանակակիրներին` վարչապետը, մասնավորապես, նշեց. «Չափազանց կարևոր է, որ այս համակարգում կան պարկեշտ, արժանի մարդիկ, դրական ձեռքբերումներ և շատ հաճախ հենց այդ դրական օրինակներով առաջնորդվելը կարող է ավելի լուրջ խթան հանդիսանալ ոլորտում առկա թերությունները հաղթահարելու գործում»:
Այս տարի Ազատության պաշտպանի մրցանակին արժանացան ՀՀ երեք դատավորներ` Ռուզաննա Բարսեղյանը, Հովսեփ Բեդևյանն ու Մարինե Մելքոնյանը: Ըստ կազմակերպիչների, դատավորների ընտրության հիմքում ընկած են իրավունքի կարևորագույն սկզբունքներին հետևելը, իրավապահ ու պետական այլ մարմիններին ամենաբարձր չափորոշիչներ առաջադրելը և դատական անկախություն հանդես բերելը:
Ազատության պաշտպանի մրցանակը շնորհվում է մարդու իրավունքների, ժողովրդավարության և սոցիալական արդարության պաշտպանությամբ հանդես եկող անհատներին ու հասարակական կազմակերպություններին:
Անցնել հիմնական բովանդակությանը