Սիրելի զինակից ընկերներ,

Հպարտությամբ ու ջերմորեն շնորհավորում եմ Ձեզ Երկրապահի օրվա առթիվ:

Մեր անկախ պետականության կերտման ու կայացման գործում մեծ և անժխտելի է Երկրապահի անցած փառավոր ուղին, որի մասին ընդմիշտ կվկայի մեր ժողովրդի պատմությունը: Երկրապահ կամավորականը, սպառնացող օրհասական վտանգի պահին, իր բազում նվիրյալներով ստանձնեց հայրենիքի սահմանների պաշտպանության, երկրի անվտանգության ապահովման պատասխանատվությունը՝ խորհրդանշելով մեր արդար պայքարի կամքն ու անկոտրում ոգին: Մենք գլուխ ենք խոնարհում մեր մարտական ընկերների, այն զոհված ազատամարտիկների հիշատակի առջև, ովքեր անառիկ պահեցին մեր երկրի սահմաններն ու ապագայի նկատմամբ հավատը: Երկրապահ կամավորականների միությունը, նվիրվածությամբ ու հավատով, այսօր էլ շարունակում է իր նշանակալի ավանդն ունենալ բանակային կադրերի համալրման, զոհված և վիրավոր ընկերների ընտանիքներին սատար կանգնելու, երիտասարդ սերնդի ռազմահայրենասիրական դաստիարակության գործում: Խնդիրներ, որոնք կենսական են նաև այսօր և պետք է լուծվեն բոլորիս ընդհանուր ջանքերի ու միասնական աշխատանքի արդյունքում:

Համոզված եմ, որ ապավինելով իր փառավոր ուղուն ու դավանած արժեքներին, Երկրապահը այսուհետ ևս կառաջնորդվի ԵԿՄ հավերժ նախագահ Սպարապետ Վազգեն Սարգսյանի գլխավորությամբ նախանշված սկզբունքներով՝ հավատարիմ մնալով իր բուն կոչմանն ու նպատակներին:

Սիրելի ընկերներ,

Շնորհավորելով հպարտության տոն դարձած այս գեղեցիկ օրվա առթիվ, մաղթում եմ Ձեզ, Ձեր ընտանիքներին ու մեր ողջ ժողովրդին խաղաղություն, առողջություն և երջանկություն: