Վարչապետի մամուլի քարտուղար Նազելի Բաղդասարյանը և Սյունիքի մարզպետ Ռոբերտ Ղուկասյանը Կառավարության «Հումանիտար կենտրոնից» ներկայացրել են այն գործընթացները, որ Հայաստանի կառավարությունն իրականացնում է Լեռնային Ղարաբաղից բռնի տեղահանված անձանց հումանիտար կարիքները հոգալու համար:
Նազելի Բաղդասարյանը նշել է, որ տեղահանված անձանց թիվը մնում է նույնը՝ 100 632: Նա նշել է, որ հաշվառմանը զուգահեռ իրականացվում է նաև նույնականացման գործընթաց: Պարզաբանելով, թե սա ինչ է նշանակում, վարչապետի մամուլի քարտուղարը նշել է, որ Հայաստան մուտք գործած անձինք շատ հաճախ հաշվառման գործընթաց անցել են Գորիսում, այնուհետև՝ կեցության վայրում: Կան նաև այնպիսի դեպքեր, երբ կեցության առաջնային վայրում հաշվառում անցնելուց հետո, մեկնել են այլ վայր, որտեղ կրկին հաշվառում են անցել: Կրկնություններից խուսափելու համար, իրականացվում է նաև նույնականացման գործընթաց: Այս պահի դրությամբ, ըստ Նազելի Բաղդասարյանի, հաշվառված և նույնականացված անձանց թիվը կազմում է շուրջ 98 000:
Նազելի Բաղդասարյանի ներկայացմամբ, այսօրվա դրությամբ, արդեն իսկ 6592 աշակերտ հաճախում է դպրոց: Ըստ մարզերի, բաշխվածությունը հետևյալն է. Սյունիքում՝ 237, Վայոց Ձորում՝ 117, Գեղարքունիքում՝ 303, Արարատում՝ 1112, Կոտայքում՝ 1118, Արագածոտնում՝ 329, Արմավիրում՝ 516, Շիրակում՝ 237, Լոռիում՝ 352, Տավուշում՝ 70 և Երևանում՝ 2201 աշակերտ: Դպրոցահասակ երեխաների թիվն առավել քան 21 000 է:
Շարունակվում են նաև ուսուցիչների թափուր աշխատատեղերի համալրման ուղղությամբ աշխատանքները: Նազելի Բաղդասարյանի ներկայացմամբ, թափուր տեղերի համալրման գործընթացը կլինի արտամրցութային Լեռնային Ղարաբաղից բռնի տեղահանված ուսուցիչների համար: Համալրումը տեղի կունենա գործուղման տարբերակով, ինչը նշանակում է, որ ուսուցիչները կստանան իրենց բազային աշխատավարձի 30 տոկոսի չափով հավելավճար: Այս պահին ուսուցչի 1035 թափուր աշխատատեղ կա:
Ավագ բուժաշխատողի 273 թափուր աշխատատեղ կա և 59 կրտսեր բուժաշխատողի: Բռնի տեղահանված անձանց մի մասն այժմ անցնում է վերապատրաստման դասընթացներ պետական պատվերի շրջանակում: Առողջապահության նախարարության թեժ գծի համարն է 8003:
Վարչապետի մամուլի քարտուղարը տեղեկացրել է, որ մարզերում շարունակվում են բռնի տեղահանված անձանց բնակեցման, սննդի, հիգիենայի կարիքների հոգածությանն ուղղված աշխատանքները:
Սյունիքի մարզպետ Ռոբերտ Ղուկասյանը ներկայացրել է, որ մարզում այժմ գտնվում է Լեռնային Ղարաբաղից բռնի տեղահանված 5257 անձ, որից առավել քան 4000-ը գտնվում է ոչ թե հյուրանոցային, հյուրատնային պայմաններում, այլ գտնվում է վարձակալությամբ տրված բնակարաններում կամ գյուղական բնակավայրերի սեփական տներում: Այս պահին 4100 մարդու համար սննդի և հիգիենայի պարագաների փաթեթները կամ արդեն բաժանված են, կամ ընթացքի մեջ են: Աշխատանքի նպատակով մարզի բուժհաստատություններ դիմած բռնի տեղահանված 9 անձի գործ ընթացքի մեջ է:
Վարչապետի մամուլի քարտուղարը տեղեկացրել է, որ արդեն այսօր Կառավարության նիստում կայացվել է որոշում հատկացում կատարել պետական բյուջեից՝ 100 000 դրամ միանվագ աջակցության հատկացման նպատակով: Վաղվանից փոխանցումները կմեկնարկեն: