Այսօր վարչապետ Անդրանիկ Մարգարյանն ընդունեց հանրահայտ ABB ընկերության պատվիրակությանը՝ առաջին փոխնախագահ Բրունո Բերգրենի գլխավորությամբ:

Շնորհավորելով ABB-ին Հայաստանում ներկայացուցչության բացման և «Էլեկտրաէներգիայի տեղափոխության վերակառուցում» վարկային ծրագրի գլխավոր կապալառուի մրցույթում հաղթող ճանաչվելու կապակցությամբ, վարչապետը գոհունակություն հայտնեց, որ ընկերությունը հետաքրքրված է ՀՀ-ում ընթացող տնտեսական գործընթացներով, պատրաստ՝ համագործակցելու տարբեր ոլորտներում: Նրա խոսքերով, փոխգործակցությունն ունի որոշակի հիմք, առկա է երկկողմ շահագրգռվածություն, ինչը երաշխիք է, որ իրականացվելիք ծրագրերը կլինեն երկարաժամկետ:

Բրունո Բերգրենը հավաստիացրեց, որ իրենց ընկերությունը Հայաստանում ներկայացուցչություն բացում է լուրջ մտադրություններով և պատրաստվում է գործունեություն ծավալել տնտեսության տարբեր ճյուղերում, այդ թվում՝ էներգետիկայի, հեռահաղորդակցության, արդյունաբերության ոլորտներում: ABB-ին շեշտը դնելու է այնպիսի ծրագրերի իրականացման վրա, որոնցում կներգրավվեն տեղի մասնագետները, ինժիներատեխնիկական անձնակազմը: Այն պատրաստ է դառնալու հայաստանյան ձեռնարկությունների գործընկերը:

ABB-ին իր ներկայացուցչություններն ունի աշխարհի շատ երկրներում և, Բրունո Բերգների խոսքերով, կարող է իր նպաստը բերել միջազգային շուկային ՀՀ տնտեսության ինտեգրացման խնդրում: Նա հատկապես հեռանկարային համարեց տարածաշրջանային էներգետիկ համագործակցությունը, որտեղ Հայաստանը էական դերակատարություն կարող է ունենալ: Ընկերության առաջին փոխնախագահը, այս առումով, կարևորեց հանրապետության բաշխիչ ցանցերի սեփականաշնորհման անհրաժեշտությունը՝ նշելով, որ աշխարհում առկա է էներգետիկ համակարգի մասնավորեցման միտում:

Հանդիպաման մասնակիցները հույս հայտնեցին, որ Հայաստանում ABB-ի ներկայացուցչության բացումը հնարավորություն կտա քննարկել և իրականացնել համատեղ շատ ծրագրեր: