Այսօր ՀՀ կառավարության նիստերի դահլիճում տեղի է ունեցել վարչապետ Անդրանիկ Մարգարյանի արդեն ավանդական դարձած հանդիպումը հանրապետական օլիմպիադայում հաղթող ճանաչված դպրոցականների հետ: Կառավարության ղեկավարը շնորհավորել է նրանց, հետագա հաջողություններ մաղթել, հույս հայտնելով, որ իրենց գիտելիքների հաղթարշավը հանրապետականից հետո նույն հաջողությամբ նրանք կշարունակեն միջազգային օլիմպիադաներում: Անդրանիկ Մարգարյանը շնորհավորել է նաև դպրոցների տնօրեններին և ուսուցիչներին՝ ուսման գործընթացը արդյունավետ կազմակերպելու համար, որի արդյունքն են նրանց սաների այսօրվա տպավորիչ հաղթանակները:
Հանդիպման ժամանակ ՀՀ կրթության և գիտության փոխնախարար Աիդա Թոփուզյանը ներկայացրել է, որ 2003-2004 ուս. տարում տեղի են ունեցել դպրոցականների օլիմպիադաներ 14 առարկայից՝ 4 փուլով: Դպրոցական փուլին մասնակցել է շուրջ 150 հազար աշակերտ: Մարզային փուլին՝ 52 հազար, իսկ հանրապետական փուլին՝ 1050 աշակերտ: Օլիմպիադայի անցկացմանը մասնակից են դարձել գիտության տվյալ ճյուղի ականավոր գիտնականներ, ակադեմիկոսներ, բուհական գիտության ներկայացուցիչներ: Ընդլայնվել է օլիմպիադայի անցկացման աշխարհագրությունը: Հանրապետական փուլի 45 հաղթողներ պարգևատրվել են 1-ին, 69-ը՝ 2-րդ, 99-ը՝ 3-րդ կարգի դիպլոմներով: 199 աշակերտ արժանացել է գովասանագրերի: Օլիմպիադայի հանրապետական փուլում հատկապես աչքի են ընկել Շիրակի, Լոռու, Կոտայքի, Տավուշի, Արմավիրի, Սյունիքի մարզերի դպրոցականները, Երևանի «Քվանտ», ֆիզմաթ, Շիրակացու անվան ճեմարանի, թիվ 172, 62, 55, 114, 119, 38, Պուշկինի անվան թիվ 8 դպրոցների աշակերտները: Այս տարի օլիմպիադայում աչքի են ընկել նաև ԼՂՀ դպրոցականները:
Հանդիպման վերջում վարչապետ Անդրանիկ Մարգարյանն իր կողմից ՝ իբրև փոքրիկ բարոյական աջակցություն ու գնահատանք, նվերներ է հանձնել օլիմպիադայի առաջին կարգի դիպլոմներով պարգևատրված 45 հաղթողներին, իր գոհունակությունը հայտնելով մասնակիցների թվի և աշխարհագրության ընդլայնման կապակցությամբ. «Այսքան պատրաստված ու խելացի երեխա մեկտեղ տեսնելով, վերստին համոզվում ենք, որ մեր ապագան վտանգված չէ», - նշել է ՀՀ վարչապետը: