ՀՀ վարչապետ Սերժ Սարգսյանը շնորհավորական ուղերձ է հղել Արթուր Չիլինգարովին` «Ռուսաստանի հերոս» կոչման արժանանալու կապակցությամբ, որում, մասնավորապես, ասված է.

«Հարգելի Արթուր Նիկոլայի,

Ի սրտե շնորհավորում եմ Ձեզ «Ռուսաստանի հերոս» բարձր կոչում շնորհելու կապակցությամբ, որն իրավամբ հանդիսանում է Արկտիկայի հետազոտության և յուրացման գործում ունեցած Ձեր նշանակալից վաստակի գնահատման խորհրդանիշը:

Քսան տարի անց, երկրորդ անգամ ստանալով հերոսի կոչում, Դուք շարունակում եք Ձեր ակտիվ գործունեությունը ոչ միայն որպես ականավոր բևեռախույզ և հետազոտող, այլև պետական ու հասարակական գործիչ: Ձեր վճռականությունն ու հերոսությունը լավ օրինակ են աճող սերնդի համար:

Մենք կրկնակի ուրախ ենք, որ արժանիորեն են գնահատվել մեր հարգարժան հայրենակցի գործունեությունն ու խիզախությունը, և անկեղծորեն հպարտանում ենք Ձեր նվաճումներով:

Ցանկանում եմ Ձեզ` հարգելի Արթուր Նիկոլայի, քաջառողջություն և նոր հաջողություններ Ձեր բազմակողմանի գործունեության մեջ»: