հինգշաբթի, 21 փետրվարի 2008
Հայաստանում կանոնավոր և մրցակցային նախագահական ընտրություններ անցկացնելու կապակցությամբ, հայ ժողովրդին այսօր ուղերձ է հղել և շնորհավորել Եվրամիության ընդհանուր արտաքին քաղաքականության և անվտանգության հարցերով գերագույն հանձնակատար Խավիեր Սոլանան: Շնորհավորական խոսքում, մասնավորապես, ասված է.
«Ես ցանկանում եմ շնորհավորել Հայաստանի ժողովրդին` փետրվարի 19-ին մրցակցային նախագահական ընտրություններ անցկացնելու և մասնակցության բարձր աստիճանի համար: Գոհունակությունս եմ հայտնում նաև դիտորդների միջազգային առաքելության կողմից Հայաստանի նախագահական ընտրությունների ընթացքին տրված նախնական գնահատականի կապակցությամբ, որոնց կարծիքով` ընտրությունները համապատասխանել են ԵԱՀԿ-ի և Եվրոպայի խորհրդի պարտավորություններին և չափանիշներին:
Ակնկալում եմ, որ բոլոր քաղաքական ուժերը ընտրություններից հետո կորդեգրեն պատասխանատու գործելաոճ: Բոլոր դժգոհությունները պետք է մանրակրկիտ հետաքննվեն և պետք է անդրադարձ կատարվի ընտրությունների արդյունքում արձանագրված բոլոր խախտումներին: Ցանկացած հակասություն պետք է լուծվի երկխոսության միջոցով:
Եվրամիությունը հավատարիմ կմնա Հայաստանի հետ հետագա համագործակցության ամրապնդմանը` հիմնվելով Եվրոպական Հարևանության Քաղաքականության վրա:
Հայաստանի նոր նախագահի ընտրությունները նաև հարևանների հետ հարաբերությունների բարելավման քայլեր ձեռնարկելու հնարավորություն են: Դա ներառում է ղարաբաղյան հակամարտության լուծմանն ուղղված ջանքերի վերսկսումը: Եվրամիությունն աջակցում է ԵԱՀԿ Մինսկի խմբի ջանքերին և անհրաժեշտ օժանդակություն կցուցաբերի հակամարտության կարգավորման գործընթացին»:
