հինգշաբթի, 21 փետրվարի 2008
ՀՀ նախագահական ընտրություններում տարած հաղթանակի կապակցությամբ ՀՀ վարչապետ Սերժ Սարգսյանին շնորհավորել է Լեռնային Ղարաբաղի Հանրապետության Ազգային Ժողովի նախագահ Աշոտ Ղուլյանը, որում, մասնավորապես, ասված է.
«ԼՂՀ Ազգային Ժողովի և անձամբ իմ անունից ի սրտե շնորհավորում եմ Ձեզ ՀՀ նախագահի 2008թ. փետրվարի 19-ի ընտրություններում Ձեր տարած արժանավայել հաղթանակի կապակցությամբ:
Արցախում նույնպես մենք ուշի ուշով հետևում էինք նախագահական ընտրությունների քարոզարշավի ընթացքին, և մեզ համար ևս օրըստօրե տեսանելի էր դառնում համաժողովրդական քվեարկությունում Ձեր հաջողության հեռանկարը:
Ընտրությունների առաջին իսկ փուլում Ձեր հաղթանակը խոսուն վկայություն է այն մասին, որ Հայաստանի ժողովուրդն իր մեծամասնության մեջ լիովին ընդունում ու պաշտպանում Ձեր` փորձառու պետական ու քաղաքական գործչի, նվիրյալ հայրենասերի, հռչակած նախընտրական ծրագրի դրույթները` ուղղված երկրի հաստատուն առաջընթացի ու բարօրության ապահովմանը:
Համոզված ենք, որ ՀՀ նախագահի բարձր ու պատասխանատու պաշտոնում Ձեր ապագա գործունեությունը մեծապես կնպաստի համայն հայության միասնականության ամրապնդմանն ու համազգային բնույթի բազմաթիվ խնդիրների իրականացմանը:
Ընդունեք մեր լավագույն բարեմաղթանքները` քաջառողջություն Ձեզ, ամենայն հաջողություն Ձեր առաքելության մեջ` ի շահ և ի փառս ողջ հայ ժողովրդի:
